Marzaluk: Polšča pavinna vybačycca pierad Biełaruśsiu za histaryčnyja hrachi
U interviju resursu sonar2050.org deputat Pałaty pradstaŭnikoŭ, staršynia parłamienckaj kamisii pa adukacyi, kultury i navucy Ihar Marzaluk zajaviŭ, što na jaho dumku, kab budavać narmalnyja miždziaržaŭnyja dačynieńni Polšča pavinna vybačycca pierad Biełaruśsiu za svaje histaryčnyja hrachi, u tym liku za złačynstvy Rajsa-Buraha, piša Radyjo Svaboda.
Razmova z deputatam tyčyłasia histaryčnych pytańniaŭ. Marzaluk, jak viadoma, pavodle svajoj asnoŭnaj prafiesii historyk, doktar histaryčnych navuk, prafiesar.
Adkazvajučy na pytańnie žurnalista, Ihar Marzaluk u pryvatnaści vykazaŭsia nakont pytańnia pra ŭšanavańnie pamiaci bajcoŭ Armii Krajovaj u Biełarusi. Tut, pavodle deputata, paŭstaje šmat pytańniaŭ:
«Polšča da hetaha času ad nas patrabuje miemaryjalizacyi dziejačaŭ Armii Krajovaj. Kali b jany ŭsie byli paśladoŭnymi baraćbitami z Hitleram, to čamu nie. Ale fakty pra inšaje havorać. Rabavali i źniščali jany našy vioski. Byŭ vidavočny i adkryty hienacyd litoŭcaŭ i biełarusaŭ, naprykład, na Haradzienščynie. Uspomnić taho ž Ramualda Rajs-Buraha. Jon vykarystaŭ niamieckija mietady: ludziej spalvali. Adnosna niadaŭniaja reabilitacyja hetaha čałavieka — heta plavok u dušu biełarusam biełastockich ziamiel. Jak viadoma, u studzieni 2017 hoda ŭ pamiać Buraha byŭ navat arhanizavany marš va ŭschodniaj Polščy. Heta vyklikała abureńnie miascovych biełarusaŭ. A Bury ž nie adziny taki «hieroj». Para b užo spynić ich uźvialičvańnie i prydumlać abhruntavańnie ich nievinavataści».
Kali ž Marzaluka spytalisia pra budučyniu biełaruska-polskich dačynieńniaŭ i ci jość jana, jon adkazaŭ:
«A čamu nie? My ž nie zaklikajem da pomsty. My zaklikajem da elemientarnaj spraviadlivaści. Elemientarna. Treba skazać: «Prabačcie nas».
