Dzieciuki & Michaś Čarot. «Pabudzić bałota hučnym šumam»
Hurt Dzieciuki zapisaŭ dla prajektu partału TuzinFM «(Nie)rasstralanaja paezija» pieśniu na vierš Michasia Čarota «Buntar».
Michaś Čarot — toj samy aŭtar «Kupalinki», jakaja doŭhi čas ličyłasia narodnaj. Nastaŭnik pavodle adukacyi, aktor trupy Hałubka, artyst choru Teraŭskaha, udzielnik antypolskaha padpolla i arhanizatar paŭstanckich atradaŭ padčas hramadzianskaj vajny i intervencyi. Jon byŭ adnym sa stvaralnikaŭ «Maładniaka» i ŭładalnikam samaha pieršaha paśviedčańnia abjadnańnia. Mienavita pa jahonaj apovieści «Śvinapas» byŭ źniaty film «Lasnaja byl», jaki pretenduje na zvańnie pieršaj biełaruskaj stužki. Svoj apošni vierš «Prysiaha» jon vydrapaŭ u kamery «amerykanki» pierad rasstrełam u 1937-m… Padrabiaźniej pra hetuju nadzvyčaj cikavuju asobu raspaviadzie daśledčyca Hanna Sieviaryniec u miežach adkrytaj lekcyi prajektu «(Nie)rasstralanaja paezija» 20 kastryčnika ŭ kniharni «Łohvinaŭ».
PADTRYMAĆ PRAJEKT NA TALAKA.BY
Vierš «Buntar» — biezumoŭna jość vizytoŭkaju Čarota. Radki «Ja šumlivy čarot, ja miaciežny buntar//Ja bałota budžu hučnym šumam» vydatna padyšli pad estetyku haradzienskaj folk-pankavaj farmacyi Dzieciuki. Muzyki ź vialikim intaresam pastavilisia da prajektu. «Jak tut nie ličyć prajekt važnym, kali ceły płast intelihiencyi zakapali ŭ ziamlu?, — kaža vakalist kamandy Aleś Dzianisaŭ. — Pra heta treba kazać. I spiavać. Usio što zastałosia ad paetaŭ — ich tvory. Šmat što było zniščana, ale i šmat zastałosia. Vydatny prajekt, bo daje mahčymasć zahinuŭšym paetam zviarnucca da naščadkaŭ»…
NABYĆ KVITOK NA KANCERTNUJU PREZENTACYJU PRAJEKTU «(NIE)RASSTRALANAJA PAEZIJA»
Muzyki sychodzili z taho, što taki buntarski vierš-kryk čałavieka nieabyjakavaha, jakomu balić, musić być vyrašany ŭ adpaviednym bajavym nastroi. Tamu atrymałasia mažornaja pieśnia, jakuju napisaŭ hitaryst kamandy Andrej Pudzin, a kančatkovuju aranžyroŭku zrabili ŭsie razam. «Nie mahu skazać, što lohka pracavałasia. Štości źmianiali, niejkija kavałki vykidali, zatoje, zapisalisia davoli chutka!», — kaža Aleś.
Dzieciuki planujuć vykonvać «Buntara» na svaich kancertach.
Dzieciuki «Buntar» (muzyka hurtu, słovy Michasia Čarota)
Ja šumlivy čarot, ja miaciežny buntar.
Ja bałota budžu hučnym šumam.
U vadzie ja žyvu i abmyt daždžom chmar,
Ale zmoŭknuć nia dam svaim strunam.
Uzdymu duch ludziej, prabudžu ich ad snu —
Słavu, budučnaść ja im praroču…
Ja, miaciežny buntar, kliču žyćcia viasnu,
Kliču k pracy svabodnaj i tvorčaj.
Jak nia sčujuć mianie, ja macniej zahudu,
Dam hučniejšy akord pieśni novaj…
A kab zmyć ź ziamli brud, skałychnu ja vadu,
Što daždžom naliłasia śvincovym.
Čamu ž vy, pieśniary, što budzili ludziej,
Čuć nia chočacie pieśni čarota?
Našy pieśni — naš klič, bo adnych my hrudziej,
Kraj adzin naš — to naša bałota.
Dyk šumi, jak šumieŭ, vielikan-jasakar,
Šapaci, śpieły kołas, u poli…
A ja pieśniu svaju budu pieć — ja buntar!
Budu klikać narod svoj da Voli.
(1922)