Biełaruski stvaryli papularny telehram-kanał pra byłych chłopcaŭ
Jon piša vam pa načach «Śpiš?» i choča viarnuć byłyja adnosiny, ale ŭžo pozna. Usio, jak u žyćci.
Moža być, chtości ŭžo čuŭ pra telehram-kanał «Byłaja». Siońnia na jaho padpisanyja bolš za 90 tysiač čałaviek — heta samy papularny kanał u Rasii. U žniŭni jaho vykupili va ŭładalnika za $20 tysiač, a potym jašče raz pierapradali, užo za $95 tysiač.
Udakładnim, što «Byłuju» stvaryŭ ruski stendap-komik Artur Čaparan, viadomy pa vystupach u Stand-Up Club #1 i šou «viečarviečar». Arturu padałosia kłasnym, što mesendžar daje mahčymaść dasyłać usim, chto padpišacca, asabistyja paviedamleńni z apaviaščeńniami, na jakija nielha adkazać. Heta vielmi pachodzić na žyćciovyja realii, kali byłaja kachanaja ŭsio piša, a ty joj nie adkazvaješ. Pierš za ŭsio, chłopiec stvaraŭ kanał, kab paviesialicca, i jaho humar amal adrazu acanili tysiačy čałaviek: kožny ź ich paznavaŭ siabie, tamu kantent chutka nabiraŭ šalonuju kolkaść prahladaŭ. Ludzi dzialilisia im i dasyłali siabram.
Byli siarod naziralnikaŭ i tyja, chto nie acanili žarty: fieministki abvinavacili aŭtara ŭ seksiźmie, bo svaim kantentam jon vystaŭlaje žančyn słabymi. Ale chutka ŭ mesendžary źjaviŭsia i kanał «Były» — śviet uraŭnavažyŭsia.
Praŭda, takuju ž papularnaść «Były» nie atrymaŭ: kantent byŭ słabavaty, niekatoryja repliki vyhladali nadumana i štučna. Kolkaść padpisantaŭ nie našmat pierasiahnuła ličbu ŭ try tysiačy.
Kali try siabroŭki ź Biełarusi — Ania, Daša i Kacia [dziaŭčaty pakul nie chočuć śviacić proźviščy] — ubačyli heta, vyrašyli stvaryć svoj simulatar byłoha chłopca. Tym bolš, što ŭ ich samich chapała historyj pra adnosiny ź minułaha.
Siońnia za «łomkaj» narodžanaha imi piersanaža naziraje amal 8 tysiač čałaviek.
«U kožnaha z nas byli byłyja mužčyny ci žančyny. Možna sumavać pa tym časam, a možna z hetaha śmiajacca. My abrali druhi šlach. Paviedamleńni ad Byłoha — heta jak vialiki manałoh adnaho chłopca, jaki tym ci inšym čynam padobny da ŭsich našych pieršych, druhich ci trecich partnioraŭ», — skazali «Ninie» stvaralnicy kanała.
Dziaŭčatam užo pačali zamaŭlać pieršuju rekłamu na kanale, ale jany pahadžajucca daloka nie na ŭsie prapanovy — kłapociacca pra aŭdytoryju.
«U asabistyja paviedamleńni nam časta pišuć słovy padziaki za toje, što my robim. Padpisantam padabajecca takoj voś sfarmavanaj hramadoj rahatać ź niejkich znajomych situacyj. Ja hetak sama śmiajałasia, kali čytała toje, što pisaŭ komik Artur dla svajoj, ciapier užo minułaj «Byłoj»», —dadaje Hanna, jakaja, darečy, u minułym hrała ŭ KVZ.
Dziaŭčaty płanujuć raźvivać kanał i dalej. Nu i, kaniešnie, praciahvać śmiajacca nad našymi z vami byłymi adnosinami. Usio ž heta kudy lepš za nyćcio.
