Duraŭ raspavioŭ pra sproby FBR padkupić raspracoŭščykaŭ Telegram
Zasnavalnik i hienieralny dyrektar Telegram Pavieł Duraŭ raspavioŭ u intervju vydańniu The Baffler pra cisk z boku ahientaŭ FBR.
Śpiecsłužby ZŠA pačali im cikavicca jašče ŭ 2014 hodzie, adrazu paśla taho, jak jon pad ciskam uładaŭ pradaŭ svaju dolu va Ukantakcie i nazaŭsiody źjechaŭ z Rasii.
Ahienty cikavilisia jaho pracaj u sacyjalnaj sietcy i suviaziami z rasijskimi ŭładami. Paźniej ahienty FBR pačali cikavicca jaho pracaj u papularnym mesendžary Telegram i šyfravańniem paviedamleńniaŭ u im.
«Mnie nie spadabalisia hetyja pytańni, — skazaŭ Duraŭ. — Ja nie chacieŭ rabicca amierykanskim kratom, tamu ja prosta daŭ im minimum infarmacyi, jakaja ŭžo i da hetaha była raspaŭsiudžanaja ŭ ŚMI».
U mai 2016 hoda, kali Pavieł Duraŭ razam z hrupaj raspracoŭščykaŭ pryjechaŭ u ZŠA na kanfierencyju Google, dva ahienty FBR ranicaj pryjšli da jaho na arandavanuju chatu i pačali zadavać pytańni pra «Telehram».
Jany skazali, što pavažajuć pazicyju Durava i prapanavali stvaryć sakretny kanał, praź jaki možna było b abmieńvacca infarmacyjaj ab kankretnych karystalnikach mesendžara ŭ vypadku ŭźniknieńnia terarystyčnaje pahrozy.
Padčas hetaha ž vizitu adnaho z raspracoŭščykaŭ «Telehrama» dapytali supracoŭniki kibierbiaśpieki, a zatym i ahienty FBR. Ich pa-raniejšamu cikaviła praca mesendžara. Ahienty prapanoŭvali «dziasiatki tysiač dalaraŭ» u abmien na nieabchodnuju infarmacyju. Paśla zakančeńnia razmovy raspracoŭščyk adrazu raskazaŭ pra toje Duravu..
