Milicyja šukaje čałavieka, jaki pradaŭ minčuku «Opiel» pa falšyvych dakumientach FOTA
U kancy lipienia hetaha hoda kala adnaho z mahazinaŭ pa praśpiekcie Rakasoŭskaha ŭ Minsku adbyłasia ździełka pa prodažy aŭtamabila «Opiel Zafira» 2003 hoda. Aŭto było acenienaje pradaŭcom u 4 tysiačy dalaraŭ. Na aŭtamabili mielisia tranzitnyja numary, paviedamlaje aficyjny pradstaŭnik Leninskaha RUUS Minska Taćciana Kavalova.
Praź niejki čas novy ŭłaśnik vyrašyŭ pierapradać «Opiel». Raźmiaściŭ u internecie abjavu. Chutka znajšoŭsia i pakupnik, jaki vyrašyŭ pravieryć aŭtamabil pa najaŭnych ulikach ŭ DAI. i tut vyśvietliłasia, što mašyna nie staić i nikoli nie stajała na ŭliku ŭ Biełarusi. Milicyja zabrała aŭto dla pravierki, a jaho ŭłaśnik źviarnuŭsia ŭ pravaachoŭnyja orhany pa fakcie ździajśnieńnia ŭ dačynieńni da jaho ašukanskich dziejańniaŭ.
Milicyja vyśvietliła, što techpašpart na aŭtamabil padrobny, pašpart hramadzianina Biełarusi, jaki pradjaviŭ pradaviec, — taksama (źviestki ŭ im adnosiacca da čałavieka, jaki pamior dva hady tamu), a tranzitnyja numary byli prosta skradzienyja z pryparkavanaha na terytoryi Partyzanskaha rajona Minska aŭtamabila.
Adzinym, što adpaviadała rečaisnaści ŭ dakumientach, było fota pradaŭca.Pravaachoŭniki zaklikajuć, kali vy paznali hramadzianina, vyjaŭlenaha na im, abo majecie infarmacyju ab jaho mahčymym miescaznachodžańni, źviartacca ŭ Leninskaje RUUS Minska asabista (2-i Viełasipiedny zavułak, 9) abo pa telefonach: 8 (033) 354-14-78, 8 (025) 956-55-19.