Palityčnuju aktyvistku Natallu Haračku-Basałyhu zatrymali na palihonie vučeńniaŭ «Zachad-2017»
Palityčnaja aktyvistka Natalla Haračka znajšłasia ŭ izalatary časovaha ŭtrymańnia Barysava i zastaniecca tam da sudu.
Pavodle najaŭnaj infarmacyi, na jaje składzieny administracyjny pratakoł nibyta za drobnaje chulihanstva.
1 vieraśnia žančyna pryjechała praviedać syna Ivana, jaki prachodzić terminovuju słužbu i ciapier znachodzicca na vajskovym palihonie pad Barysavam.
Tam raźmieščana častka padraździaleńniaŭ, zadziejničanych u vajskovych vučeńniach «Zachad-2017».
Uviečary taho ž dnia jana paśpieła zatelefanavać kaleham i paviedamiła, što znachodzicca ŭ aŭtamašynie rasiejskich vajskoŭcaŭ u Barysavie.
Pa jaje słovach, jana vyjšła z maršrutki №10 na skryžavańni kala «Barysaŭ-Areny» i pajšła ŭ bok lesu. Śledam rušyli dvoje vajskoŭcaŭ. Nieŭzabavie padjechała mašyna, na rasiejskim numary byŭ paznačany 50-ty rehijon Rasiei. Jaje prymusili sieści, unutry byli dva rasiejskija vajskoŭcy, adzin z kapitanskimi pahonami. Nie pradstavilisia, nie skazali, chto jany takija i kudy viazuć.
U vyniku prybyli na KPP №1. Tam ź joj, pa jaje słovach, razmaŭlaŭ biełaruski aficer, jaki nazvaŭsia padpałkoŭnikam Hałavinym, praz słova kryŭ maciukami. Paśla hetaha vyklikaŭ milicyju, supracoŭniki dastavili jaje ŭ Barysaŭski RAUS.
Natallu Haračku apytaŭ aperatyŭny dziažurny kapitan milicyi Mikałaj Mikulič i skazaŭ, što jana volnaja. Adnak u hety čas atrymaŭ pa telefonie zahad nie adpuskać žančynu na padstavie taho, što jedzie načalstva i choča ź joj pahutaryć.
Nieŭzabavie da RAUS na praspekcie Revalucyi, 20 padjechaŭ čorny ŭsiedarožnik. Z aŭtamabila vyjšli dva čałavieki ŭ cyvilnym, za rulom byŭ kiroŭca ŭ vajskovaj formie. Nichto ź ich nie pradstaviŭsia i nie pakazaŭ nijakich dakumentaŭ, ale było pryniataje rašeńnie zatrymać Haračku.
Siońnia stała viadoma, što Haračku vinavaciać u drobnym chulihanstvie i buduć sudzić.
Miarkujučy pa ŭsim, vychodnyja joj daviadziecca pravieści ŭ kamery izalataru.
Sama Natalla Haračka ŭ razmovie z kalehami nazvała zdareńnie sprobaj jaje vykradańnia.