Kazaki, abaranki i matroški: dzień Rasii ŭ centry Minska
Pa inicyjatyvie staličnych uładaŭ usio leta ŭ Minsku buduć prachodzić dni nacyjanalnych kultur. 10 červienia la minskaj Ratušy śviatkavaŭsia Dzień Rasii. Žycharoŭ i haściej stalicy na płoščy Svabody zabaŭlali vakalnyja i tancavalnyja kalektyvy z šmatlikich rehijonaŭ Rasii. Kožny achvotny moh pačastavacca abarankam, kašaj i nabyć tradycyjnyja ruskija suvieniry — ad hželi i matrošak da paŭłaŭskich chustak.
Pamiž handlovymi šerahami chadzili skamarochi i razdavali abaranki. Časam u natoŭpie źjaŭlalisia ludzi ŭ kamuflažy sa stužkami koleraŭ rasijskaha ściahu. Na prystupkach la sceny za natoŭpam nazirała niekalki kazakoŭ.
Ad koleraŭ i raznastajnaściaŭ strojaŭ udzielnikaŭ mahło zastrakacieć uvačču, ale heta była i adna z metaŭ dnia Rasii ŭ Minsku — pakazać šmatnacyjanalny skład krainy. Siarod aktyŭnaściaŭ dla hledačoŭ byli tradycyjnyja ruskija narodnyja zabavy: hiravy sport, pieraciahvańnie kanataŭ dy kułačnyja bai.
Tydzień tamu la Ratušy prajšoŭ Dzień Šviecyi, a raskład da kanca leta nastupny:
17 červienia — Dzień kultury Kazachstana
24 červienia — Dzień kultury Litvy.
29 lipienia — Dzień kultury Finlandyi.
5 žniŭnia — Dzień kultury Karei.
12 žniŭnia — Dzień kultury Azierbajdžana
19 žniŭnia — Dzień kultury Ukrainy.
26 žniŭnia — Dzień kultury Armienii.
27 žniŭnia — Dzień kultury Indyi.
2 vieraśnia — Dzień kultury Hruzii.
16 vieraśnia — Dzień kultury Polščy.
17 vieraśnia — Dzień jaŭrejskaj kultury.