Unučka impieratara Japonii vyjdzie zamuž i stracić tytuł pryncesy
U impieratarskim domie Japonii paviedamili pra majučyja adbycca zaručyny pryncesy Maka Akisina — pieršaj unučki kirujučaha impieratara Akichita i starejšaj dački jaho syna Akisina, piša VVS.
Maka Akisina — pieršaja ŭnučka kirujučaha impieratara Japonii. Fota Reuters
Vybrańnikam 25-hadovaj pryncesy staŭ jaje adnahodak Kiej Kamura, supracoŭnik jurydyčnaj firmy. Jany paznajomilisia piać hadoŭ tamu, budučy studentami Mižnarodnaha chryścijanskaha univiersiteta ŭ Tokio.
Pakolki budučy žanich pryncesy — nie šlachietnaha pachodžańnia, z padačaj zajavy ab ustupleńni ŭ šlub pryncesa Maka pazbaŭlajecca tytuła i pakidaje impieratarskuju siamju. Joj buduć pradastaŭlenyja zvyčajnyja hramadzianskija pravy, uklučajučy prava hołasu, a taksama vypłačanaja adnarazovaja dapamoha ad dziaržavy.
Viestka pra chutkija zaručyny pryncesy sparadziła ŭ japonskim hramadstvie dyskusii pa pytańni ab nieabchodnaści vychadu prynces sa składu impieratarskaj siamji ŭ vypadku šlubu z prostymi ludźmi.
Akramia pryncesy Maka ŭ składzie impieratarskaj siamji jość jašče šeść niezamužnich prynces. Adziny pradstaŭnik mužčynskaha połu ŭ małodšym pakaleńni impieratarskaj siamji — prync Chisachita, małodšy brat pryncesy Maka.
U Japonii hučać aściarohi, što impieratarskaja siamja nie zmoža vykonvać svaje hramadskija abaviazki, kali pryncesy tak i buduć vychodzić zamuž za prostych ludziej i hublać z-za hetaha svoj tytuł.
Ekśpiertnaja hrupa japonskaha ŭrada zajaviła ab nieabchodnaści pryniaćcia terminovych mier, jakija dapamohuć zachavać impieratarskuju siamju dastatkova vialikaj.
U pryvatnaści, abmiarkoŭvajecca mahčymaść dazvolić pryncesam stvarać ułasnyja haliny impieratarskaj siamji paśla ŭstupleńnia ŭ šlub.
Pryncesa Maka (źleva) z baćkami — pryncesaj i pryncam Akisina. Fota JERA
Da aficyjnaha viasiella pryncesy Maka i Kieja Kamura pavinna adbycca niekalki važnych rytuałaŭ i pracedur.
Abrad zaručyn pa tradycyi praduhledžvaje vizit u impieratarski pałac pradstaŭnika žanicha z padarunkami. Paśla jon ža aficyjna abjaŭlaje datu šlubu.
Pa miery nabližeńnia dnia viasiella pravodzicca jašče niekalki abradaŭ, u adnym ź jakich budučaja niaviesta vykazvaje svaju ŭdziačnaść impierataru i impieratrycy.
U dzień viasiella pradstaŭnik žanicha zabiraje niaviestu z pałaca, i tolki zatym pravodzicca abrad šlubu.
U adpaviednaści z zakonam Japonskaha impieratarskaha doma, kali žančyna ź impieratarskaj siamji vychodzić zamuž nie za arystakrata, jana stanovicca prostaj žančynaj, i joj vypłačvajecca adnarazovaja dapamoha ad dziaržavy. Sumu vypłaty ŭstanaŭlivaje dziaržsaviet z udziełam premjer-ministra.
Kali ŭ 2005 hodzie Sajaka Kuroda, adzinaja dačka impieratara Akichita i impieratrycy Micika, vyjšła zamuž za haradskoha dyzajniera, jana atrymała kala 150 młn ijen (1,3 młn dalaraŭ).
Inšaja byłaja pryncesa Naryka Sienhie, stryječnaja plamieńnica impieratara, paśla viasiella z synam pieršaśviatara sintaisckaha chrama ŭ 2014 hodzie atrymała 100 młn ijen (870 tysiač dalaraŭ).
