Abjadnanaja sistema videanazirańnia: «Heta niešta bolšaje, čym prosta kamiery»
Analityk u pytańniach biaśpieki, stvaralnik sajta Belarus security blog Andrej Parotnikaŭ prakamientavaŭ dla «Našaj Nivy» navinu pra stvareńnie Respublikanskaj sistemy manitorynhu hramadskaj biaśpieki, pra jakuju ŭ paniadziełak raskazaŭ ministr unutranych spravaŭ Ihar Šunievič.
«Najpierš treba bačyć prajekt ukaza. Pakul heta vyhladaje tak, što jany chočuć zrabić centralizavanuju sistemu videanazirańnia i supraćpažarnaj biaśpieki. Tam ža havorka idzie nie tolki pra kamiery nazirańnia, ale i pra pažarnyja datčyki.
Dla čaho heta robicca? Moža być šmat varyjantaŭ: kab centralizavać padaču infarmacyi i bolš arhanizavana vydatkoŭvać siły padčas nadzvyčajnych zdareńniaŭ ci złačynstvaŭ, kab zachavać hrošy za košt źniaćcia dadatkovaha patrulavańnia, kab prosta papilić biudžetnyja hrošy ci prałabiravać čyjeści intaresy, moža, prosta čakajuć, što ŭ suviazi z ekanamičnym kryzisam, pačniecca rost złačynnaści. Moža być, biudžet nie daźvialaje pavialičyć kolkaść milicyi i tańniej ukłaścisia ŭ techničnyja srodki. Moža być, što zaŭhodna.
Ja nie dumaju, što havorka viadziecca tolki pra kamiery nazirańnia, kali b tolki pra heta, to takoje pytańnie nie razhladałasia asabista Łukašenkam. Jon ža nie budzie raźbiracca, jakoje prahramnaje zabieśpiačeńnie lepšaje, a jakoje horšaje.
Kaniečnie, heta moža być źviazana z apošnimi pratestami. Dadatkova fiksavać niejkija momanty, adsočvać pierasoŭvańni ludziej, miescy zboru. Havorka idzie pra tatalny kantrol nad situacyjaj.
Što tyčycca ahulnaj sistemy videanazirańnia, to jany jość u Sinhapury, Łondanie, dy šmat dzie.
Kali złačynnaść źmianšałasia i nie było vostraha kryzisu, to nikomu heta nie było treba. Ustaloŭvali, kaniečnie, kamiery, na tym ža čyhunačnym vakzale ich bolš za 200, ale čamuści mienavita ciapier heta vyrašyli centralizavać.
Važnym źjaŭlajecca toje, chto budzie raźmiarkoŭvać hetuju infarmacyju, jakija struktury, jaki rehłamient reahavańnia. Tam, chutčej za ŭsio, ukaz tyčycca bazavych pryncypaŭ, bazavaj architektury i sistemy reahavańnia. Heta samaje cikavaje. A toje što kamiery jany paviesiać - heta druhasnaje».
