Dźmitryjeŭ: Kazać, što nijakich suviaziaŭ sa śpiecsłužbami ŭ nas niama, zanadta ramantyčna
Adzin ź lidaraŭ kampanii «Havary praŭdu» Andrej Dźmitryjeŭ vyrašyŭ publična adkazać na abvinavačvańni Uładzimira Niaklajeva, jaki ličyć, što były kiraŭnik jaho štaba supracoŭničaŭ z KDB. Chto addaŭ zahad źmianić maršrut padychodu na Płošču-2010 kałon Niaklajeva i Statkieviča, čamu ich płan Płoščy byŭ niedaskanałym, ci adčuvaje adkaznaść za ludziej, jakija pryjšli pa ich zakliku na Płošču? Na heta i inšyja pytańni ŭ efiry Jeŭraradyjo adkazvaje adzin Andrej Dźmitryjeŭ.
Słuchać razmovu całkam:
Lepšyja cytaty z razmovy
U mianie niama kuratara ŭ KDB, jaki kaža, što rabić, kudy iści i jakuju pazicyju zajmać. Ale Niaklajeŭ kaža advarotnaje ŭžo dva hady, i heta stavić mianie ŭ składanuju situacyju: u sud nie pojdzieš, bo my viedajem, jaki ŭ nas sud, i nie pabješsia ź im z-za hetaj chłuśni - čałaviek ža va ŭzroście.
Kazać, što nijakich suviaziaŭ sa śpiecsłužbami ŭ nas niama, zanadta ramantyčna - viadoma, u jakoj krainie my žyviom. Ale nijakich suviaziaŭ, kali kažuć, što rabić, kali ŭsio kiraŭnictva padparadkoŭvałasia b KDB - takoha ŭ «Havary praŭdu», biezumoŭna, niama.
Najchutčej, u «Havary praŭdu» sapraŭdy jość zasłanyja ahienty, ale my ciapier nie robim ničoha, z-za čaho nam varta było b bajacca ŭłady.
Nie baču sensu kazać, kolki nam kaštavała pa hrašach prezidenckaja kampanija 2010 hoda. Adno mahu skazać: surjoznaja prezidenckaja kampanija ŭ Biełarusi prykładna pavinna kaštavać ad 5 i bolš miljonaŭ dołaraŭ.
Ad taho, jakim maršrutam pajšli b na Płošču Niaklajeŭ i Statkievič, ni sutnaść Płoščy, ni jaje vynik nie źmianiŭsia b - sam płan Płoščy byŭ niedaskanałym, jon byŭ zanadta naiŭnym i ramantyčnym.
Rašeńnie źmianić maršrut dastaŭki hukaŭzmacnialnaj aparatury prymaŭ štab, a nie ja adzin. I treba było heta dla taho, kab z dapamohaj publičnaści abaranić aparaturu.
Statkieviča my ličyli adnoj z pahrozaŭ dla Płoščy, jakuju my arhanizoŭvali. I jaho pryvieźli da štaba Niaklajeva, źmianiŭšy takim čynam jaho maršrut padychodu na Płošču dla taho, kab my mahli jaho kantralavać.
U nas byŭ płan - pravieści pieramovy z uradam. A ŭ Statkieviča - iści na šturm. My zahadzia vyrašyli, što kali na Płoščy Statkievič pačnie zaklikać ludziej iści na šturm - vyrubać aparaturu i pieradavać słova Niaklajevu. Jaki pavinien byŭ utrymać Płošču ad šturmu.
Ja adčuvaju siabie vinavatym za toj płan Płoščy, jaki ŭ nas byŭ. Bo hety płan byŭ scenaryjem, dobrym dla hulni, ale kiepskim dla sapraŭdnaj palityki. I kali na Kalektarnaj nas pakłali tvaram u śnieh - heta byŭ kaniec kazki. My nieadekvatna aceńvali situacyju i tamu płan naš byŭ nieadekvatnym.
Kožny na Płošču pryjšoŭ za siabie, za svaju siamju. Ale ŭ tym, što ź imi potym zdaryłasia na Płoščy, jość adkaznaść i maja, i štaba «Havary praŭdu» - my nie pradumali dobra płan dziejańniaŭ i nie zdoleli abaranić ludziej, jakija pryjšli za nami.
My vyvučyli našy pamyłki i zaraz dziejničajem bolš adkazna.
Apazicyja i bieź mianie dobra spraŭlajecca, kab pastajanna svarycca, i tamu nie zdolnaja abrać adzinaha kandydata. Ale kali jany kažuć što ŭ hetym vinavaty ja, to moža im lepš uvohule syści z palityki - kali ich tak lohka pierajhrać?
Kali Niaklajeŭ syšoŭ z «Havary praŭdu» to nivodzin čałaviek nie pajšoŭ śledam za im. Heta aznačaje, što ja - addany siabra kamandy, a kamanda - addanaja mnie jak lidaru. A Niaklajeŭ chacieŭ, kab była nie kamanda, a «fan-kłub Niaklajeva».