U staličnym derbi «Krumkačy» razhramili «Dynama» 4:1 ANŁAJN
Siońnia ŭ Minsku ŭ ramkach 8-ha tura čempijanatu Biełarusi pa futbole adbyłasia sustreča pamiž «Krumkačami» i minskim «Dynama».
21:24
Takoha, mabyć, nie čakaŭ nichto. Hledačy vielmi zadavolenyja. Hulcoŭ «Krumki» pravodzili z pola praciahłym «Małaaaajcy!»
21:22
Kala fan-siektara «Dynama» idzie razbor palotaŭ pamiž hulcami i fanatami. Sabrałasia ci nie ŭsia kamanda. Vidavočna, abmiarkoŭvajuć, što rabić dalej i jak žyć z takoj hulnioj.
21:19
Razhrom! «Krumkačy» pieramahajuć u supierpryncypovaj sustrečy minskaje «Dynama» ź likam 4:1. Možna być upeŭnienym, što paśla takich matčaŭ kolkaść hledačoŭ na trybunach budzie tolki raści.
21:15
Što heta robicca! 4:1 «Krumkačy» ŭžo dakładna afarmlajuć pieramohu ŭ sustrečy. Zabiŭ Jaŭhien Šykaŭka. Nie darma jaho tak pryhoža sustrakali zaŭziatary.
21:11
Padsieli «Krumkačy». Usio ž skazvajecca fizičny ŭzrovień padrychtoŭki futbalistaŭ. Adbivajecca ad atak «Krumka». Kala piaci chvilin zastajecca da kanca hulni.
21:09
Vielmi ahresiŭna pavodziać siabie fanaty «Dynama». «Ad…si ŭ bieła-sinich» čujecca ad ich. Trybuny z zaŭziatarami «Krumkačoŭ» adkazvajuć dabradušna «Eta očań niekrasiva!»
Akramia samoj hulni, sapraŭdnaje spabornictva adbyvałasia pamiž fanatami «Dynama» i zaŭziatarami «Krumkačoŭ».
Jak heta było, hladzicie ŭ videarepartažy NN:
21:07
Zvyčajna ŭ mai ŭłaśnik «Dynama» Juryj Čyž adpraŭlaŭ u adstaŭku hałoŭnych trenieraŭ kamandy. Ciapier Čyž u «amierykancy». Adnak paśla takoha matča i z turmy adstavić treniera mohuć.
20:57
Adzin hoł «Dynama» adyhrała. U svaje varoty zabiŭ Siarhiej Ščahrykovič. U jaho svojeasablivy dubl — hały ŭ svaje i čužyja.
«Dynama» paddušvaje. «Krumkačy» hieraična adbivajucca i džalać u kontratakach. Bramnik Fiedarenka na vyšyni.
«Vierym. Možam. Pieramožam», - masava čujecca z trybun.
20:52
«Adna stalica, adzin – kłub», — znoŭ čujecca z dynamaŭskaha siektara. «Adzin Dułub!» – iranizujuć «Krumkačy». Dułub hałoŭny trenier «Krumkačoŭ».
20:48
«Ja jaje ŭhien Šykaŭka» – na matyŭ słavutaha chita Mistera Prezidenta «Koka Džamba» sustrakajuć vychad na zamienu hulca «Krumkačoŭ».
20:44
«Chto nie skača, toj varona», — śpiavajuć dynamaŭskija fanaty. Zaŭziatary «Krumki» tolki ŭśmichajucca. Maŭlaŭ, na tabło hlańcie, chto z nas jašče varona.
20:40
Ale varta pachvalić dynamaŭskich fanaŭ. Užo ŭ faktyčna bieznadziejnaj dla kamandy situacyi jany praciahvajuć vielmi choraša padtrymlivać svaich chłopcaŭ.
U «Dynama» zdaryłasia apošniaja zamiena. Zuboviča pamianiaŭ Rotkavič. Jašče 35 chvilin hulni, a zamien užo nie zastałosia.
20:36
Vielmi pryhožy hoł afarmlajuć «Krumkačy». Spačatku Viačasłaŭ Hleb addaŭ miač na fłanh, a paśla atrymaŭ u adkaz pas u centr, upeŭnieny ŭdar Hleba i — 3:0! Ništo sabie!
20:34
Na hulni prysutničaje eks-kandydat u prezidenty, lidarka «Havary praŭdu» Taćciana Karatkievič, aktyŭna topić za «Krumku».
20:32
Startavaŭ druhi tajm. U pierapynku niechta Kanstancin vyjhraŭ apłočany tur u Francyju.
U «Dynama» druhaja zamiena: zamiest Jarockaha źjaviŭsia Uładzimir Karyćka.
20:17
Pieršy tajm skančvajecca atakami «Krumkačoŭ». Hledačy zadavolenyja tym, jak raźvivajecca matč. Pakul — 2:0.
U pierapynku siarod hledačoŭ buduć razyhranyja bilety ŭ Paryž.
20:10
Zubovič mieŭ vielmi pierśpiektyŭny momant, ale nie zmoh adyhrać choć adzin miač da pierapynku.
Varta adznačyć, što mnohim hledačam nie chapaje kresłaŭ, jany vymušanyja stajać. Mabyć, bolš za 5 tysiač čałaviek pryjšło siońnia na «Kamvolščyk». Nadvorje ŭsio jašče ŭśmichajecca hledačam i futbalistam.
20:05
«Dynama» krychu prycisnuła «Krumkačoŭ». Pačynajuć źjaŭlacca momanty ŭ bieła-błakitnych. Mocna streliŭ abaronca Najok, Fiedarenka adbiŭ miač pierad saboj, ale nikoha na dabivańni nie było. Zatoje ŭ «Krumkačoŭ» adkryvajecca mahčymaść hulni na kontratakach. Viačasłaŭ Hleb moža ŭciačy ŭ pierśpiektyŭnuju ataku.
20:00
Paŭhadziny ŭžo adhulali kamandy. Absalutna nie bačna, za košt čaho «Dynama» budzie adyhravacca.
Trenier «Dynama» Vuk Rašavič zrabiŭ užo pieršuju zamienu. Pole pakinuŭ bałharski lehijanier Viktar Hienieŭ, źjaviŭsia napadnik Hleb Rasadkin.
Bramnik «Krumkačoŭ» Fiedarenka ŭpeŭniena zabiraje ŭsie naviesy, što iduć u jaho varatarskuju.
Publika ŭ «Krumkačoŭ» vielmi dobrazyčlivaja. Paśla takich hulniaŭ prychilnikaŭ u kamandy pavinna stanavicca bolej.
19:52
«Dynama» ŭsio jašče nie moža stvaryć nivodnaj asensavanaj ataki. Chacia dziela spraviadlivaści skažam, što realizacyja momantaŭ u «Krumkačoŭ» blizkaja da 100%.
Miač zalacieŭ na trybuny, uzbudziłasia publika.
19:47
Dy nu nafih! 2:0! «Krumka» źniščaje supiernika. «Dynama» ŭ poŭnym šoku, hulcy nie razumiejuć, što adbyvajecca.
Druhi hoł zabivaje Siarhiej Ščahrykovič, jaki letaś hulaŭ u «Słavii». Futbalist ukałaciŭ miač pad samuju pierakładzinu.
Mabyć, navat samyja addanyja fanaty «Krumkačoŭ» nie čakali takoha raźvićcia padziej.
19:43
Hoooooooooooł! «Krumkačy» u pieršaj asensavanaj atacy zabivajuć miač. 1:0! Adznačyŭsia Siarhiej Korsak. Jon u chakiejnym styli prapichnuŭ miač u varoty paśla taho jak jaho nie zmoh zafiksavać Hutar.
«Napierad, «Krumka», my z taboj», śpiavajuć trybuny!
19:39
Možna śćviardžać, što anšłah jość!
19:38
Pakul hulnia prachodzić bieź niebiaśpiečnych momantaŭ. Kožny ŭdały momant u vykanańni «Krumkačoŭ» supravadžajecca škvałam emocyj na trybunach.
19:35
Składy kamand:
«Krumkačy»: Fiedarenka, Baciščaŭ, Hleb, Ivanoŭ, Kałuhin, Korsak, S.Ščahrykovič, Skšyniecki, Talejka, Vasileŭski, Jašyn.
«Dynama»: Hutar, Adamavič, Banhura, Hienieŭ, Haboŭda, Jarocki, Najok, Astravuch, Pramudraŭ, Žukoŭski, Zubovič.
19:32
Hulnia pačałasia. Fan-siektar «Dynama» vielmi pryhoža staŭ zaŭzieć za svaju lubimuju kamandu. Zaŭziatary «Krumkačoŭ» nie daciahvajuć da takoj padtrymki.
Dyktar abviaščaje składy na biełaruskaj movie. Prahramki da hulni taksama zroblenyja na našaj movie.
19:30
Asnoŭnaja trybuna zaniataja hledačami całkam. Na supraćlehłaj trybunie miescaŭ jašče chapaje, adnak ludzi ŭsio jašče padciahvajucca. Anšłah sapraŭdy moža być.
19:25
Dynamaŭcy abviaščali hłabalnuju mabilizacyju fanataŭ na hulniu, adnak pakul na trybunach, moža, niekalki sotniaŭ čałaviek. Kamandy vychodziać na hazon. Zaŭziatary sustrakajuć svaju lubimuju kamandu vopleskami, fanaŭ «Krumkačoŭ» na stydyjonie nieparaŭnalna bolej.
19:22
Hety matč užo paśpieli achryścić jak «Chipstary suprać fanataŭ». U «Krumkačoŭ» niama arhanizavanaj fanackaj hrupoŭki, zatoje kłub za apošni hod istotna abros zaŭziatarami. Jašče hod nazad na «Krumkačoŭ» chadzili tolki fryki, što cikaviacca realijami pieršaj lihi.
19:17
Pradstaŭniki «Krumkačoŭ» zmahli stvaryć vydatnuju, siabroŭskuju atmaśfieru pierad hulnioj. Možna było sfotkacca z maskotam kamandy, prysutničaŭ kłoŭn. Była mahčymaść zabić miač u maleńkija varoty, za što atrymać u padarunak biaspłatny kvas ad «Krynicy».
Pierad pačatkam hulni na poli taniec vykanali prychilnicy «Krumkačoŭ» samych roznych uzrostaŭ. Było dastatkova kranalna.
***
Samy słavuty kłub stalicy budzie hulać suprać adnaho z parušalnikaŭ spakoju ŭ ajčynnym futbole. Na dadzieny momant abodva kłuby majuć pa 11 punktaŭ u turnirnaj tablicy. I heta ŭ značnaj stupieni siensacyja, asabliva što tyčycca «Krumkačoŭ», bo pierad pačatkam siezona mnohija pradrakali navičkam baraćbu za vyžyvańnie.
«Krumkačy» – razam zmožam pieramahčy», — śpiavaje himn kłuba hurt Rel1kt. Publika vielmi pryjazna reahuje na takija śpievy. Muzyka «Relikta» dastatkova ciažkaja, ale hledačy navat zachacieli, kab chit vykanali paŭtorna.
«NN» budzie vieści anłajn sa stadyjona «Kamvolščyk». Pačatak hulni a 19:30.
