Inšy Maks Korž — lepšyja pieśni i videa ź bieł-čyrvona-biełaj epochi
Redakcyja Tuzin.fm adabrała samyja krasamoŭnyja treki i videaroliki, jakija zdolnyja dać ujaŭleńnie pra zusim inšaha Maksa Karža.
Maks Korž pačynaŭ u supołcy Lunclan, jakaja paŭstała ŭ kastryčniku 2006 hodu ŭ Łunincy. Jany pryncypova karystalisia biełaruskaj movaj, a siarod inšych maładych rep-prajektaŭ vyłučylisia svaim vializarnym składam. Kolkaść vakalistaŭ LunClan siahała 10-12 čałaviek. U svaim pieršym interviju na «Tuzinie Hitoŭ» jany takim čynam tłumačyli hetuju akaličnaść.
«Sprava ŭ tym, što našaja muzyka składajecca na asnovie hučnaha kryku. I značna praściej padniać ludziam nastroj, kali na scenu vyvalvajucca ŭsie 10 čałaviek zamiest adnaho i pačynajuć čytać. I nam viesieła i słuchačam pahladzieć cikava. Heta zavodzić.
Da taho ž, kali tabie adzin čałaviek raskazvaje pra svaje palityčnyja pohlady i pra toje, jak treba žyć, to ty naŭrad ci jamu pavieryš, a kali niekalki, to ty adčuješ bolš davieru, maŭlaŭ takich mnoha, užo nia strašna. Usio heta troški psychalahičnyja rečy, na jakija my taksama starajemsia źviartać uvahu. A ŭvohule, chočacca rabić sapraŭdy jakasnuju muzyku, kab z nas brali prykład i ŭ astatnim».
U pieršych tvorach Lunclan piajecca ŭ asnoŭnym na dźvie temy – kachańnie i palityka. Jany ŭvajšli ŭ debiutny albom «Razmaŭlaj sa mnoj pa-biełarusku». Jaho dahetul možna spampavać na resursie Rap.by. Na svaju samuju mocnuju pieśniu na toj čas «Kraina maraŭ» chłopcy źniali amatarski klip.
Imionaŭ svaich udzielniki Lunclan nie nazyvali, a na tvary naviazvali chustki. Tolki na prezentacyi ich treku ŭ čarcie na «Tuzinie» u traŭni 2008 hodu stała viadoma imia aŭtara kampazycyj. Pieśniu «Pracoŭny čaćvier» stvaryŭ Maks Korž na sempł Boba Marli.
Trek byŭ pradstaŭleny takim čynam: «My – rep-hurt, ale ŭ hetym tvory my pasprabavali sumiaścić rep i rehi. Na našuju dumku, atrymałasia dobra. Pryśviačajem hety trek usim, chto žyvie ŭ vialikim horadzie.
Tym ludziam, chto mitusicca štodnia, z domu da pracy, z pracy dadomu. Tym, chto pa paŭhadziny stajać u korkach. Hetym trekam my chacieli skazać, što kožny z nas čałaviek, a nia robat i kožny z nas maje prava na adpačynak u niezaležnaści ad času. My ŭpeŭnienyja, što kali ludzi buduć słuchać hety trek u hadzinu pik, to ich nastroj zaŭvažna ŭzdymiecca».
Pieśnia mieła peŭny pośpiech na «Tuzinie Hitoŭ», zaniaŭšy pa vynikach hałasavańnia druhoje miesca ŭ čarcie. Na toj čas udzielniki Lunclan pastupili na vučobu ŭ Miensk chto kudy. Korž pajšoŭ na fakultet mižnarodnych adnosinaŭ u BDU (pravučyŭsia, praŭda, tolki dva kursy). Tady jon pačaŭ pracavać, jak solny vykanaŭca. U asnoŭnym duetam z udzielnikami mienskaj rep-tusoŭki M.U.Skool. Pryčym praciahvaŭ padkreślena karystacca biełaruskaj movaj. Adzin z amatarskich klipaŭ tych časoŭ – viasiołaje studenckaje videa «Čukčy».
Uvaha – nienarmatyŭnaja leksika!
Bolš cenzurny trek tych časoŭ – My World, jaki Korž zapisaŭ razam z tym ža Akme dy Bloody Svinakoł, jaki ciaper u jaho na bek-vakale.
Korž feat. Akme feat. Bloody Svinakoł - My World
Što da farmacyi Lunclan, to apošni raz na publiku jany vyjšli ŭ traŭni 2010 hodu, kali ŭ klubie «Reaktar» prajšoŭ Pieršy festyval biełaruskamoŭnaj rep-muzyki.
Darečy, pra hety kancert Maks zhadvaje ŭ piesieńcy «Cieť»: «Kohda v “Rieaktorie” s trudom my prokačali pustoj zał rukoj. I my s pacanami srazu ušli v zapoj. Vot čto ja imieł vvidu, tohda skazav tiebie, čto skoro my vzorviom». Łuninieckija repiery tady ŭ svaim vystupie vychvalalisia nabytaj mienskaj prapiskaj, hanarliva zajaviŭšy prysutnym, što jany pryjechali z Rozački dy Hrušaŭki dy prezentavali pieśniu pra stalicu, jakaja mahła by z poŭnym pravam pratendavać na rep-himn Miensku.
Chłopcy zapisali paru novych trekaŭ, ale da albomu sprava nie dajšła. Maks uziaŭsia za karjeru ŭsurjoz. Pisać vyrašyŭ pa-rasiejsku, kab pacelić u tutejšuju klubnuju aŭdytoryju. Klip novaha Karža «Niebo pomožiet nam» zrabiŭ jaho dalejšaje žyćcio. Ciapier u hetaha videa bolš za 1 000 000 prahladaŭ na Youtube. Ahułam ža ahulnaja ličba prahladaŭ jaho aficyjna vykładzienych klipaŭ pierasiahnuła ŭžo 5 miljonaŭ prahladaŭ.
Vykanaŭca ź Biełarusi padpisaŭsia z rasiejskim łejbłam Respect Production, jaki pracuje z «Kastaj» dy staŭ častym hościem u Maskvie dy Piciery. Pieśni pa-biełarusku ŭ jaho repiertuary źnikli čysta.
Adnak, pierad svaim pieršym vializarnym mienskim solnikam u Pałacy sportu ŭ interviju Tuzin.fm. vykanaŭca zajaviŭ, što biełaruščyny nie vyrakajecca.
«Ź biełaruskamoŭnaha repu ja nikudy nie sychodziŭ. Prosta ja ciapier pracuju trochi ŭ inšaj płyni. Tak, kaniečnie, u mianie buduć treki. Chutčej za ŭsio, jany buduć pa-za albomam, ale buduć. U mianie, darečy, jašče jość šmat niedaroblenych demak na movie z tych časoŭ, kali ja zajmaŭsia biełaruskamoŭnym repam.
Viedaješ, tak atrymałasia, što heta niejak u tupik usio išło. Dy i prosta dziaŭčyna mianie zbłytała i ja zapisaŭ pieśniu «Hdie tvoja lubov» na rasiejskaj movie. I ŭsie takija — tak, kruta-kruta! I razumieješ, kali ludzi kažuć, što heta kruta — spynicca ciažka. Voś i ŭsio. Mnohija ludzi kazali, maŭlaŭ: «Nu, a jakaja roźnica na jakoj movie rabić?» Ja raniej dumaŭ, što nikoli nia budu na rasiejskaj movie čytać, ale mnohija kazali: «Ty prynosiš ludziam kajf, dabro, pazytyŭ, čamu b i nie začytać?» Nu voś tak usio i adbyłosia».
