Navukoŭcy navučylisia padymać pradmiety ŭ pavietra hukavymi chvalami
Navukoŭcy navučylisia padymać abjekty i pieramiaščać ich u pavietry z dapamohaj hukavych chvalaŭ.
Havorka idzie ab kropli vady vieličynioj niekalki milimietraŭ, ale daśledčyki kažuć, što ŭ budučyni zmohuć padymać i ludziej. Praŭda, jany nie viedajuć, ci zmoža čałaviek vytrymać taki «atrakcyjon».
Daśledčykam z Łabaratoryi termadynamiki i najnoŭšych technałohijaŭ u Ciurychu ŭpieršyniu ŭdałosia padniać nad pavierchniaj kropli vady, złučyć ich i pakrucić zubačystku ŭ pavietry, piša vydańnie New Scientist. Pryncypovym adroźnieńniem novaj technałohii, jakaja vykarystoŭvaje siłu huku dla procivahi hravitacyi, jość mahčymaść kantralavać ruch padniatych abjektaŭ.
Dzimas Pulikakas i jaho kalehi raspracavali sistemu rezanataraŭ, jakaja stvaraje tak zvanuju stajačuju hukavuju chvalu i moža źmianiać jaje formu, tym samym pieramiaščajučy padniatyja ŭ vuzłach hetaj chvali abjekty. Padčas ekśpierymientu navukoŭcy złučyli dźvie kropli vady, a taksama hranulavanuju raspuščalnuju kavu z kroplaj vady.
«Upieršyniu možna ruchać materyju takim bieskantaktavym, ale kantralavanym sposabam», — zaŭvažaje Dzimas Pulikakas.
Levitacyja była mahčymaja i da hetaha času, i nie tolki jak fokus iluzijanistaŭ. Navukoŭcy ŭzdymali ŭ pavietra žab i ssoŭvali ciahniki. Adnak raniej dla taho, kab padniać štości ŭ pavietra, vykarystoŭvalisia mahnitnyja i elektrastatyčnyja pali. Jany istotna abmiažoŭvali charaktarystyki abjektaŭ levitacyi — hetyja abjekty musili mieć peŭnyja elektryčnyja ci mahnitnyja ŭłaścivaści.
Zatoje vysokačastotnyja akustyčnyja chvali dazvalajuć padymać roznyja pradmiety, niezaležna ad ich ułaścivaściaŭ, z adnoj umovaj: maksimalny dyjamietr abjekta pavinien adpaviadać pałovie daŭžyni hukavoj chvali, jakaja ŭžyvajecca dla levitacyi. «Hetaja technałohija dazvalaje padymać i pieramiaščać što zaŭhodna», — kaža Dzimas Pulikakas.
Ciapier technałohija abmiežavanaja nievialikimi abjektami sa ščylnaściu jak u vady, ale navukoŭcy čakajuć, što zmohuć padymać i pieramiaščać navat ludziej, bo ščylnaść cieła čałavieka nie nadta pieravyšaje ščylnaść vady. Pamiery taksama nie majuć značeńnia. Ale čym bolšy abjekt, tym bolšaj pavinnaja być amplituda chvali, jakaja trymaje jaho ŭ pavietry. Adnak značnaja siła chvali aznačaje značnuju siłu procivahi. «Nie ŭpeŭnieny, što čałaviek zmoža pieražyć akustyčnyja chvali», — adznačaje Dzimas Pulikakas.
Akustyčnuju levitacyju płanujuć vykarystoŭvać dla vyvučeńnia chimičnych reakcyjaŭ u ekstremalnych asiarodździach, pieramiaščać niebiaśpiečnyja rečyvy, a taksama simulavać nizkuju hravitacyju kosmasu.
