Бутан вакцынаваў амаль усё насельніцтва за тыдзень. Прычым зрабіў гэта вельмі незвычайным метадам
85% дарослага насельніцтва Бутана, дзяржавы ў Гімалаях, атрымала першую дозу вакцыны ад COVID-19. Аналагічным вынікам могуць пахваліцца Ізраіль і Сэйшэльскія выспы, але там на ўсё спатрэбілася тры месяцы. Бутан зрабіў гэта за восем дзён, прычым цікавым метадам, піша «Радыё Свабода».
pixabay.com
Невялікае будысцкае каралеўства, якое месціцца паміж Індыяй і Кітаем, заявіла некалькі дзён таму, што 470 000 з 770 тысячаў яго жыхароў атрымалі першую дозу вакцыны AstraZenecа.
Вакцыны былі вырабленыя ў Індыі і са студзеня паэтапна перадаваліся ўрадам у Дэлі. Але Бутан не спяшаўся. Замест таго, каб расстаўляць прыярытэты па групах і ствараць чэргі, ён вырашыў пачакаць, пакуль у яго будзе дастаткова вакцын, каб вакцынаваць усіх адразу.
Улады звярнуліся па параду да групы будысцкіх манахаў, якія пастанавілі, што няўдалае ў той час размяшчэнне зорак азначае, што вакцынацыю трэба прыпыніць на два месяцы, а пасля ўпэўніцца, што першая доза будзе ўведзеная жанчынай, якая нарадзілася ў год Малпы, іншай жанчыне такога самага ўзросту.
Усё было зроблена менавіта так. Кампанія вакцынацыі праходзіла як радаснае дзяржаўнае мерапрыемства.
Улады Бутана, нягледзячы на моцную рэлігійнасць, дзейнічаюць у адпаведнасці з навуковымі прынцыпамі. Кароль Джыгмэ Хэсар Намг’ял Вангчук загадаў стварыць Корпус нацыянальнай службы, які дапамог укамплектаваць больш за 1200 пунктаў вакцынацыі па ўсёй краіне.
На сённяшні дзень у краіне зарэгістравана 896 выпадкаў заражэння COVID-19 і адна смерць.
