Butan vakcynavaŭ amal usio nasielnictva za tydzień. Pryčym zrabiŭ heta vielmi niezvyčajnym mietadam
85% darosłaha nasielnictva Butana, dziaržavy ŭ Himałajach, atrymała pieršuju dozu vakcyny ad COVID-19. Anałahičnym vynikam mohuć pachvalicca Izrail i Sejšelskija vyspy, ale tam na ŭsio spatrebiłasia try miesiacy. Butan zrabiŭ heta za vosiem dzion, pryčym cikavym mietadam, piša «Radyjo Svaboda».
pixabay.com
Nievialikaje budysckaje karaleŭstva, jakoje mieścicca pamiž Indyjaj i Kitajem, zajaviła niekalki dzion tamu, što 470 000 z 770 tysiačaŭ jaho žycharoŭ atrymali pieršuju dozu vakcyny AstraZeneca.
Vakcyny byli vyrablenyja ŭ Indyi i sa studzienia paetapna pieradavalisia ŭradam u Deli. Ale Butan nie śpiašaŭsia. Zamiest taho, kab rasstaŭlać pryjarytety pa hrupach i stvarać čerhi, jon vyrašyŭ pačakać, pakul u jaho budzie dastatkova vakcyn, kab vakcynavać usich adrazu.
Ułady źviarnulisia pa paradu da hrupy budysckich manachaŭ, jakija pastanavili, što niaŭdałaje ŭ toj čas raźmiaščeńnie zorak aznačaje, što vakcynacyju treba prypynić na dva miesiacy, a paśla ŭpeŭnicca, što pieršaja doza budzie ŭviedzienaja žančynaj, jakaja naradziłasia ŭ hod Małpy, inšaj žančynie takoha samaha ŭzrostu.
Usio było zroblena mienavita tak. Kampanija vakcynacyi prachodziła jak radasnaje dziaržaŭnaje mierapryjemstva.
Ułady Butana, niahledziačy na mocnuju relihijnaść, dziejničajuć u adpaviednaści z navukovymi pryncypami. Karol Džyhme Chesar Namhjał Vanhčuk zahadaŭ stvaryć Korpus nacyjanalnaj słužby, jaki dapamoh ukamplektavać bolš za 1200 punktaŭ vakcynacyi pa ŭsioj krainie.
Na siońniašni dzień u krainie zarehistravana 896 vypadkaŭ zaražeńnia COVID-19 i adna śmierć.
