Сенсацыйна адкрыты падземны ход ля Сафійскага сабора даўно вядомы?
Археолагі кажуць, што яшчэ з
Інфармацыя пра тое, што ля полацкай Сафіі знойдзены невядомы дагэтуль падземны ход, стала сенсацыяй у інтэрнэце. Аднак амаль адразу з’явілася і некалькі абвяржэнняў, паводле якіх знойдзены ход ужо даўно вядомы, а фотаздымкі, зробленыя краязнаўцамі братамі Бухавецкімі ў сутарэннях былога бернардынскага манастыра, дзе цяпер месціцца псіхіятрычны шпіталь.
На старонках «Советской Белоруссіі» пра знаходку выказаўся археолаг Сяргей Тарасаў, які паведаміў, што пра існаванне гэтага хода, а дакладней, дрэнажнай сістэмы, вядома ад 70-х гадоў, і ён сам аднойчы трапіў туды, пра што і расказаў Бухавецкім. Праўда, за 40 гадоў пра ход паспелі забыцца. І браты Бухавецкія нездарма трымаюць у таямніцы месцазнаходжанне ўвахода ў сутарэнні: можа стаць нагодай для пачатку адміністратыўнай справы.
«Аднак мы адразу паведамілі пра знаходку ў Акадэмію навук. — кажа Андрэй Бухавецкі. — І ў КДБ, і ў музей — як і трэба па законе. Спадар Тарасаў мае рацыю — пра гэты ход даўно вядома, і ніякай сенсацыі ў гэтай знаходцы няма, прынамсі такой, якой яе выстаўляюць СМІ. З другога боку, нехта зверху дакладна не хоча, каб мы займаліся краязнаўствам, мне так і казалі: «Вы робіце надта шмат знаходак, а ў вас нават няма гістарычнай адукацыі. Вас трэба спыняць». Аднак на наступным тыдні я чакаю дэлегацыю Акадэміі навук — паглядзім, што скажуць яны».
Што тычыцца «спрэчнага» фота, то на ім, паводле Андрэя Бухавецкага, можна ўбачыць тупік кляштара базыльянаў, да якога вядзе ход.
У Краязнаўчым музеі карэспандэнта «НН» запэўнілі, што ніхто да іх не звяртаўся са знаходкай падземнага хода і наўрад ці бы браты Бухавецкія сталі публікаваць фотаздымкі адтуль, бо тады яны цалкам падпадаюць пад адміністратыўны артыкул. Супрацоўнікі музея сам падземны ход пакуль не бачылі, аднак параўноўваюць гэтую знаходку з гісторыяй падробкі Расонскага ідала.
