У Светлагорску нарэшце адкрылі лядовы палац. Яго будавалі з 2012 года
Сёння прайшло ўрачыстае адкрыццё лядовага палаца ў Светлагорску, які будавалі больш за 10 гадоў. Дзеля эканоміі першапачатковы праект значна спрасцілі. «Флагшток» параўнаў, што планавалася пабудаваць спачатку і што атрымалася ў выніку.
Адкрыццё ФАК «Светлагорск-Арэна» 31 студзеня 2024 года. Фота: тэлеграм-канал старшыні аблвыканкама
Перш за ўсё, знік другі паверх з панарамным шкленнем. Для эканоміі нават адмовіліся ад квадратных алюмініевых панэляў. Замест іх прымяняецца ашалёўка з таннага металапрофілю, такім звычайна абшываюць прыпыначныя павільёны.
Зменшылася і колькасць месцаў, праўда, зусім нязначна: замест 500, прадугледжаных першапачаткова, у будаўнікоў выйшла 490.
Паводле даных інвестыцыйнай праграмы 2022 года, на будаўніцтва палаца меркавалася выдзеліць 12,35 млн рублёў. Ці ўдалося што ашчадзіць на будаўніцтве, невядома.
Знешні выгляд лядовага палаца з праектнай дакументацыі
Будаўніцтва Светлагорскага лядовага палаца ўпершыню было пачата ў 2012 годзе. Неўзабаве яно было закінута на ўзроўні падмурка, праект палічылі занадта дарагім для рэалізацыі.
Для завяршэння будаўніцтва ў 2022 годзе быў створаны новы праект, які ўсё адно пасля прыйшлося пераглядаць, каб зрабіць больш танным.
Чытайце таксама:
У Светлагорску ламаюць падмурак грандыёзнага Лядовага палаца, каб пабудаваць што сціплейшае
У Мазыры зноў заявілі пра будаўніцтва лядовай арэны. Яе абяцаюць аж з 2009 года
слава Светлагорску