На выбарах у Перу левы радыкал перамагае дачку дыктатара, перавага — 0,198%
Прадстаўнік леварадыкальнай партыі «Вольнае Перу» Педра Кастыльё атрымлівае перамогу на прэзідэнцкіх выбарах у краіне, піша ТАСС.
Падлічана пакуль каля 99,2% бюлетэняў. За Кастыльё прагаласавалі 8 800 081 выбаршчык (50,198%). Яго апанентку Кейку Фухіморы з правай партыі «Народная сіла» падтрымалі 8 730 535 выбаршчыкаў (49,802%). Больш за 25% выбарцаў (6,3 млн) не з'явіліся на ўчастках.
Ад пачатку падліку галасоў з невялікай перавагай лідзіравала Фухіморы. Кастыльё не прызнаваў паразы і заклікаў прыхільнікаў захоўваць спакой, прапаноўваючы дачакацца завяршэння апрацоўкі бюлетэняў у сельскай мясцовасці. Пры гэтым прадстаўнікі леварадыкальнай партыі запатрабавалі ад ЦВК весці максімальна пільны падлік усіх галасоў.
Абраны прэзідэнт Перу ўступіць у пасаду 28 ліпеня. Яго тэрмін паўнамоцтваў складае пяць гадоў.
