Крымінальную справу 47-гадовай жыхаркі Бараўлян аб паклёпе на генпракурора перадалі ў суд
Генеральная пракуратура накіравала ў суд крымінальную справу па абвінавачванні 47-гадовай жанчыны ў паклёпе на генеральнага пракурора Андрэя Шведа па арт. 188 КК, піша БелТА.
«Жанчына ў адным з публічных чатаў Telegram-канала 1 лютага 2021 года, знаходзячыся ў сябе дома ў вёсцы Бараўляны Мінскага раёна, стварыла і распаўсюдзіла для агляду неабмежаванай колькасці карыстальнікаў месенджара інфармацыю, якая не адпавядала рэчаіснасці. У ёй утрымліваліся загадзя лжывыя звесткі, што ганьбуюць пацярпелага і прымяншаюць яго гонар і годнасць як грамадзяніна і службовай асобы ў сувязі з ажыццяўленнем ім службовай дзейнасці», — распавялі ў Генпракуратуры.
Крымінальную справу распачало і расследавала Упраўленне ўласнай бяспекі Генпракуратуры.
Жанчына пад падпіскай аб нявыездзе. Па крымінальным артыкуле ёй пагражае штраф ці папраўчыя работы на тэрмін да двух гадоў або арышт ці абмежаванне волі да трох гадоў.