Ізраіль зняў амаль усе каранцінныя абмежаванні. Краіна вяртаецца да нармальнага жыцця
У Ізраілі з 1 чэрвеня адмяняюцца амаль усе каранцінныя абмежаванні, уведзеныя з-за каранавіруснай інфекцыі.
Olivier Fitoussi/Flash90
У гэты дзень скончыўся тэрмін дзеяння «зялёных пропускаў» (дазвол на наведванне пэўных месцаў тым, хто выздаравеў ад кавіду, і вакцынаваным) і «фіялетавых знакаў» (стандарт, які пацвярджае магчымасць эксплуатацыі гатэляў і нумароў у перыяд пандэміі), піша Times of Israel.
Тыя, хто прайшоў вакцынацыю, а таксама яшчэ не прышчэпленыя грамадзяне могуць свабодна наведваць грамадскія месцы.
Знятыя абмежаванні для грамадскага транспарту, крам, рэстаранаў і іншых устаноў, таксама можна праводзіць масавыя мерапрыемствы ў памяшканнях і на паветры. Большасць прадпрыемстваў і школ у краіне вярнуліся да нармальнай працы.
Разам з тым пакуль застаецца ў сіле абавязковае нашэнне ахоўных масак у закрытых памяшканнях. Гэта абмежаванне будуць здымаць паэтапна.
Таксама працягваюць дзейнічаць абмежаванні на ўезд і выезд з Ізраіля. Грамадзянам па-ранейшаму забаронены ўезд у краіны з высокім узроўнем распаўсюджвання каранавіруса, за выключэннем асаблівых выпадкаў. У гэты спіс уваходзяць Расія, Азербайджан, Украіна, Эфіопія, Бразілія, ПАР, Індыя, Мексіка і Турцыя. Усе, хто прыязджае з гэтых краін, павінны пайсці на каранцін, нават калі яны зрабілі прышчэпку ад COVID-19 або перахварэлі. Гэтая мера будзе дзейнічаць да 13 чэрвеня і працягваецца ў выпадку неабходнасці.
Тыя, хто прыязджае ў Ізраіль з іншых краін, павінны будуць здаць два тэсты на каранавірусную інфекцыю, гэта датычыцца і тых, хто прайшоў вакцынацыю.
Ізраіль вакцынаваў 55% насельніцтва цалкам, прычым 70% узростам ад 20 гадоў. У найбліжэйшы час урад павінен даць дазвол на ванкцынацыю дзяцей узростам да 12 гадоў.
У цяжкім стане знаходзіцца 49 чалавек, з іх 36 на ШВЛ, паводле даных Міністэрства аховы здароўя, апублікаваных у панядзелак. Гэтая лічба скарацілася са 100 цяжкахворых у пачатку мая і з 1200 у студзені, у разгар трэцяй хвалі.
