«Спрабаваў схавацца ў прыбіральні і пазбавіцца ад грошай». За хабар затрыманы дырэктар Баранавіцкага станкабудаўнічага завода
Супрацоўнікі ГУБАЗіК МУС затрымалі 1 сакавіка дырэктара Баранавіцкага станкабудаўнічага завода (філіял ЗАТ «Атлант») і начальніка бюро камерцыйнага аддзела падчас атрымання хабару, паведамляе прэс-служба МУС.
Паведамляецца, што кіраўнік прадпрыемства спрабаваў схавацца ў прыбіральні свайго кабінета і пазбавіцца ад грошай. Аднак грошы ўдалося канфіскаваць. Хабар быў як у расійскіх рублях, так і ў амерыканскіх далярах.
Устаноўлена, што мужчыны атрымалі хабар ад прадстаўніка чалябінскай фірмы за своечасовае выкананне дагавораў паставак металавырабаў.
Паводле інфармацыі ГУБАЗіК, работнікі айчыннага завода маглі атрымліваць «адкаты» штогод у выглядзе працэнта ад сумы тавараабароту. Як правіла, рабілася гэта праз трох-чатырох пасярэднікаў.
СК распачаў крымінальныя справы паводле ч. 2 арт. 430 (Атрыманне хабару ў значнай суме). Падазраваныя змешчаныя ў ізалятар часовага ўтрымання.
