Сёння — першыя Грамніцы, або Дзень сурка
2 лютага каталікі і пратэстанты адзначаюць Стрэчанне. 15 лютага яго святкуюць праваслаўныя ў Беларусі, Расіі і Украіне, што трымаюцца юліянскага календара.
Сурок Філ, pixabay.com
У хрысціянскім календары азначае Cустрэчу (Стрэчанне) Ісуса Хрыста ў Іерусалімскім храме з праведным Сімеонам і Ганнай прарочыцай.
Дзякуючы мас-культуры мы гэты дзень у ЗША і Канадзе ведаем, як Дзень сурка. Гэта калі сурок Філ са штата Пенсільванія варожыць, якая будзе вясна. Філ праславіўся дзякуючы аднайменнаму фільму з Білам Мюрэем у галоўнай ролі. Традыцыі больш за 130 гадоў.
Што да Беларусі, то на Грамніцы ў цэрквах свецяць свечкі, каб яны аберагалі хаты ад перуна.
У народзе кажуць: «Грамніцы — палавіна зіміцы, маразоў палавіцы», ад сёння сонца павяртае на вясну.
У адрозненне ад ЗША і Філа, у нас свае прыкметы на Грамніцы.
Яны такія: «Як на Грамніцы певень нап’ецца вадзіцы, дык на Юр’я [23 красавіка] вол наесца травіцы» (калі сёння адліга, то і вясна будзе ранняй),
«Як на Грамніцы адліга, з ураджаю будзе хвіга» (калі сёння адліга, то вясна ранняя, а яна не спрыяе добраму ўраджаю, бо рана высыхае зямля).
Сёння ў Мінску з раніцы было мінус 16.
