«Давайце пагаворым пра чалавечнасць». Рэдактарка Tut.by звярнулася да кіраўнікоў галіны аховы здароўя
Галоўная рэдактарка Tut.by Марына Золатава апублікавала адкрыты ліст, адрасаваны міністру аховы здароўя Дзмітрыю Піневічу, яго першаму намесніку Алене Богдан, галоўнаму санітарнаму доктару Аляксандру Тарасенку і галоўнаму доктару ДУ «Рэспубліканскі клінічны медыцынскі цэнтр» Ірыне Абельскай.
«Што вы робіце звычайна па выходных? — пытаецца ў іх Золатава. —
Лыжы, фітнес, басейн, саўна? Адпачынак на прыродзе ў коле сям'і і сяброў? Гэта выдатна. Надзя Калініна ў пятніцу ўвечары клікала ў госці сябровак — на гарбузовы суп. У суботу «хацелі паснедаць у кафэ, каб зразумець, што хоць вакол пекла, мы жывыя і можам быць шчаслівымі». Не выйшла. Таму што ў пятніцу ўвечары Надзя апынулася на Акрэсціна.
І вось ужо прайшла субота, сканчаецца нядзеля — Надзя ўсё яшчэ там. І, хутчэй за ўсё, — а мы ўжо дасведчаныя людзі, таму што з мая 2020 года журналістаў TUT.BY затрымлівалі 39 разоў — у панядзелак будзе які-небудзь суд. «Які-небудзь» — бо мы нават не ведаем, за што на Надзю склалі пратакол.
Тысячы людзей з мая 2020 года прайшлі праз ізалятары. Акрэсціна, Жодзіна, Баранавічы — якія асацыяцыі выклікаюць у вас гэтыя назвы?
Вы цяпер будзеце гаварыць пра баевікоў, тэрарыстаў, злачынцаў, парушальнікаў закона і іншыя паняцці, у якія вы па нейкіх прычынах верыце ці робіце выгляд, што верыце. Але мой ліст аб іншым. Тым больш, што канкрэтная Надзя Калініна ў пятніцу днём ішла асвятляць з'езд дэлегатаў ад Мінска на Усебеларускі народны сход. Ды і затрыманні, суды, пакаранні — гэта не да вас, вядома.
Давайце пагаворым аб чалавечнасці і міласэрнасці. Я спадзяюся, для вас гэтыя словы не пусты гук. Вы ж выбіралі медыцыну, напэўна, для таго, каб дапамагаць людзям? Таму што чалавечыя пакуты прыносяць вам боль?
Больш за тры тыдні на Акрэсціна не прымаюць перадачы. У Жодзіне іх таксама перасталі прымаць. Наогул. Можна перадаць толькі лекі — ды і то з рыпам. А яшчэ некалькі месяцаў таму перадачы прымалі штодзень, потым раз на тыдзень.
Каранавірус, кажаце? Аднак ён не перашкаджае ўтрымліваць у камеры, разлічанай на шасцярых, 16 чалавек, а таксама рэгулярна «раскідваць» людзей па розных камерах.
Давайце прыкінем з вамі, ці можна пратрымацца 15 сутак (распаўсюджаны тэрмін адміністрацыйнага арышту) без перадач. Без цёплых рэчаў, без пасты і зубной шчоткі, без сродкаў гігіены, без бялізны. Ну, а калі месячныя? Уявілі?
15 сутак без зменнай бялізны!
Дапусцім, ваша вера ў «злачынцаў-баевікоў і іншае» непахісная, як і ў «святасць дзейнай улады». Але, скажыце, дзесьці напісана, што адсутнасць чыстых трусоў і зубной пасты ў ІЧУ дадае ачкоў у карму або спрыяе выпраўленню? А пасцельнай бялізны і матрацаў? Дзесьці сказана, што дзяржава будзе мацнейшай, калі затрыманыя паводле адміністрацыйных спраў будуць ляжаць на голых нарах і нават на падлозе ў перапоўненых камерах або калі іх не будуць вадзіць у душ цягам 15 дзён?
Ці вы думаеце, што чалавек, правёўшы хай нават не 15, а трое сутак у ізалятары ў такіх умовах, прасякнецца да ўлады павагай? «О-о-о-о! Напэўна, гэта ўлада такая моцная менавіта таму, раз можа сабе дазволіць так здзекавацца з арыштантаў?»
«Адміністрацыйна арыштаваным дазваляецца атрыманне пасылак, перадач, бандэроляў і дробных пакетаў без абмежавання іх колькасці» — гэта вытрымка з артыкула 18.7 Працэсуальна-выканаўчага кодэкса Рэспублікі Беларусь аб адміністрацыйных правапарушэннях.
Права на перадачы, індывідуальнае спальнае месца, пасцельныя прыналежнасці, штодзённыя прагулкі і па крайняй меры штотыднёвы душ гарантавана адміністрацыйна затрыманым і правіламі ўнутранага распарадку месцаў адбыцця адміністрацыйнага арышту.
У МУС вам скажуць, што гэтыя правілы выконваюцца. Але пацікаўцеся ў калег-медыкаў, якія пабывалі на Акрэсціна і ў Жодзіне. Упэўненая, у вас ёсць такія знаёмыя.
Вось і ўсё, мабыць.
Спадзяюся, вы добра правялі выходныя», — напісала Марына Золатава.
