Мінчанка хацела выкрасці касметыку на адміністратыўку, але пралічылася з коштам ценяў для павекаў
Міліцыя затрымала мінчанку, якая скрала касметыку з крамы. Яна спрабавала разлічыць суму шкоды, каб не патрапіць пад крыміналку, але трохі пралічылася. Пра гэта паведамляе ГУУС Мінгарвыканкама.
31-гадовая мінчанка вынесла з крамы каля 10 касметычных вырабаў — яе затрымала міліцыя.
Затрыманая патлумачыла, што планавала выкрасці касметыку на суму да 10 базавых велічынь (270 беларускіх рублёў). Так супраць яе не змаглі б распачаць крымінальнай справы ў выпадку затрымання. Але не разлічыла кошт ценяў для павекаў, у выніку перабрала «ліміт». Шкода краме склала 296 рублёў — а гэта ўжо крымінальная справа.
Цені, слоічкі з крэмам і лакі для пазногцяў жанчына схавала ў кішэні курткі і штаноў, а потым прадала на найбліжэйшым рынку за палову цаны.
Раней яе ўжо прыцягвалі да крымінальнай адказнасці за аналагічныя злачынствы.
