«Чэ» Чэрачань набраў 400 чалавек, будзе плаціць па 1 рублі за подпіс
Кіраўнік партыі «Грамада» Сяргей Чэрачань усё адно мае намер стаць кандыдатам у прэзідэнты, нягледзячы на пандэмію і ранняе абвяшчэнне прэзідэнцкіх выбараў.
«Гэта ўнесла карэкціроўкі. Давядзецца працаваць больш інтэнсіўна, чым планавалася адразу, але планаў не мяняю», — кажа палітык.
Па ягоных словах, на сёння ініцыятыўная група налічвае каля 400 чалавек, якія «рэальна будуць збіраць подпісы». «Цягам бліжэйшых дзён паспрабуем дагнаць да 1000 чалавек.
Дзесьці 30% збіраць подпісы не будзе, але 700 чалавек павінна хапіць. Праўда, невядома, як гэта будзе працаваць у часы пандэміі», — зазначае кіраўнік «Грамады».
Актывісты расказалі «Нашай Ніве», што ім абяцалі па 1 рублі за кожны сабраны подпіс. Ці праўда гэта?
«Я лічу, што кожная праца павінна быць аплачана. І гэта не грошы за подпіс, а на булачку, чай, на жэтон у метро», — іншасказальна адказвае Чэрачань.
Цяпер у інтэрнэце з’явілася візуальнае афармленне кампаніі Сяргея Чэрачаня, яна будуецца на літарах «Че». «Гэта не адсылка да Чэ Гевары — гэта проста дзве мае першыя літары прозвішча, а таксама ёсць вайсковы панятак «Час Ч» — умоўны час пачатку аперацыі, вайсковых дзеянняў», — кажа прэтэндэнт.
