Каранік — дэпутату: Нам, у адрозненне ад вас, сорамна не будзе
У інтэрв'ю з дэпутатам Палаты прадстаўнікоў Тэнгізам Думбадзэ журналіст «Наша Нівы» прыгадаў, што на адным з пасяджэнняў парламента той спытаўся ў міністра аховы здароўя Караніка, ці не будзе сорамна праз два месяцы. Міністр адказаў, што не будзе. Прайшоў пакуль адзін месяц. Як на сёння дэпутат ацэньвае дзеянні дзяржавы, Караніка?
«Сам я сказаў Караніку на тым пасяджэнні: можа, мы не ўсё ведаем? Можа, варта без прэсы правесці сустрэчы? Можа, нам не кажуць, а сітуацыя нашмат горшая?
А ён адказаў мне так: «Нам, у адрозненне ад вас, сорамна не будзе».
Міністр аховы здароўя Уладзімір Каранік, фота Надзеі Бужан
Пасля гэтага на мяне некаторыя чыноўнікі пачалі коса паглядваць, дарэчы. Але сёння ёсць у мяне пытанні да Караніка», — адказаў дзейны дэпутат.
Журналіст папрасіў удакладніць, якія менавіта пытанні ёсць у Тэнгіза Думбадзэ да ведамства.
«Чамусьці рост [колькасці захворванняў] павялічваецца, хоць шмат якія меры прымаюцца. Я гаварыў з медыкамі, заўважна, што ідзе харошая праца, гэта грэх не заўважыць. Але пытанні ёсць. Калі мы рапартуем, што ўсё ў нас выдатна, — на мой погляд, не зусім усё так», — падзяліўся Думбадзэ.
