Кампанія Ілана Маска адклала запуск групоўкі спадарожнікаў праекта Starlink
Амерыканская кампанія SpaceX не здолела запусціць на арбіту 60 мікраспадарожнікаў праекта Starlink. Апараты прызначаныя для забеспячэння доступу да высакахуткаснага інтэрнэту, піша tass.ru.
Старт ракеты-носьбіта Falcon 9 з мыса Канаверал (штат Фларыда) быў адменены літаральна за некалькі секунд да запуску. «Стандартны аўтаматычны адбой, выкліканы перарывам у паступленні дадзеных падчас праверкі магутнасці рухавікоў. Мы аб'явім новую дату запуску, як толькі атрымаем пацвярджэнне наяўнасці такой магчымасці», — патлумачыла ў сваім Twitter кампанія пад кіраўніцтвам Ілана Маска.
Першая ступень носьбіта выкарыстоўвалася раней чатыры разы для вываду апаратаў на калязямную арбіту. Гэтыя пускі адбыліся ў ліпені 2018 года, у кастрычніку таго ж года, у лютым і лістападзе 2019 года. Кампанія планавала зноў вярнуць ступень, пасадзіўшы яе ў дыстанцыйным рэжыме на платформу Of Course I Still Love You ў Атлантычным акіяне. SpaceX удасканальвае гэтую тэхналогію, каб зрабіць таннейшымі запускі розных апаратаў на калязямную арбіту.
Кожны спадарожнік важыць прыблізна 260 кг і мае плоскую форму для кампактнасці. Апараты абсталяваныя бартавымі рухавікамі, якія дазваляюць схадзіць з арбіты Зямлі. SpaceX запэўнівае, што спадарожнікі нават пры адмове рухавікоў будуць у аўтаматычным рэжыме зніжаць арбіту і згараць у шчыльных слаях атмасферы ў перыяд ад аднаго года да пяці гадоў пасля заканчэння тэрміну эксплуатацыі.
Сетка Starlink прызначана для забеспячэння доступу ў інтэрнэт карыстальнікаў на ўсёй планеце за кошт разгортвання на калязямной арбіце вялікай колькасці малых апаратаў (вагой да 500 кг). Гэтая сістэма сувязі паўсюдна, у тым ліку ў цяжкадаступных і маланаселеных раёнах, будзе забяспечваць шырокапалосны доступ у інтэрнэт на хуткасці 1 гігабіт у секунду, што адпавядае стандарту 5G.
Як удакладніла SpaceX, на пачатковым этапе яна плануе забяспечыць доступ да высакахуткаснага інтэрнэту для жыхароў паўночных раёнаў ЗША і Канады на працягу бягучага года і пашырыць ахоп Starlink на населеныя раёны планеты да 2021 года. Паводле ацэнкі кампаніі, размяшчэнне на арбіце агулам 11 тыс. спадарожнікаў і ўвод іх у эксплуатацыю абыйдзецца ў $10 млрд. У маі 2019 года ў космас былі выведзеныя першыя 60 спадарожнікаў, у лістападзе таго ж года на арбіту была дастаўлена другая групоўка апаратаў Starlink, трэцяя, чацвёртая і пятая — у студзені і лютым гэтага года.
