На праймерыз у Нью-Гэмпшыры лідзіруе Сандэрс, але Бутыджыдж саступае толькі 1,5%
Як і ў Аёве Піт Бутыджыдж у фаварытах, flickr.com
Сенатар Берні Сандэрс атрымаў перамогу на праведзеных у аўторак праймерыз Дэмакратычнай партыі ЗША ў штаце Нью-Гэмпшыр, піша ria.ru.
Як сведчаць вынікі з 90% участкаў для галасавання, яму аддалі перавагу каля 26% выбаршчыкаў (звыш 70 тысяч чалавек).
На другім месцы з 24,4% фінішаваў Піт Бутыджыдж, на трэцім - сенатарка Эмі Клобушар (19,8%). Чацвёртае месца заняла сенатарка Элізабэт Уорэн (9,3%), а пятае — лідар сацапытанняў былы віцэ-прэзідэнт Джо Байдэн (8,4%).
Нягледзячы на няпоўныя звесткі галасавання, эксперты і вядучыя амерыканскія СМІ прагназуюць, што прынцыпова сітуацыя не зменіцца і пераможца ўжо вызначаны.
Кандыдат ад Дэмакратычнай партыі на прэзідэнцкія выбары 2020 года будзе названы на з'ездзе партыі ў ліпені. Самі выбары пройдуць 3 лістапада.
