Як міліцыя ў Гомелі брала штурмам кватэру наркагандляра ВІДЭА
Яшчэ ў сакавіку ў абласным цэнтры супрацоўнікі міліцыі спынілі для праверкі 32-гадовага жыхара аграгарадка Яроміна. У яго выявілі папяровы скрутак з рэчывам, якое, па заключэнні эксперта, з'яўляецца асабліва небяспечным псіхатропным рэчывам - альфа-PVP. Агульная маса псіхатропу 0,0174 г, паведамляе гомельская міліцыя.
Мужчына распавёў, што набыў наркотык у 24-гадовага гамельчука. «Супрацоўнікі аддзялення па наркакантролі і супрацьдзеянні гандлю людзьмі Савецкага РАУС пры падтрымцы байцоў АМАП УУС аблвыканкама інфармацыю праверылі. Пасля чарговага факту продажу наркотыкаў было прынята рашэнне аб затрыманні жыхара Гомеля», - распавялі ў групе інфармацыі і грамадскіх сувязяў.
На просьбы адамкнуць дзверы кватэры гаспадар адказаў адмовай. Жыллё бралі штурмам праз аконны праём. Як адзначылі ва УУС, вокамгненны захоп гаспадара кватэры дазволіў зберагчы доказы. Палімерны пакет з альфа-PVP знаходзіўся на вагах. У кватэры канфіскавалі 0,2554 г наркотыку.
