Нобелеўская прэмія па медыцыне прысуджана за тэрапію раку
У Стакгольме абвешчана імя ўладальніка Нобелеўскай прэміі па медыцыне і фізіялогіі.
BREAKING NEWS
The 2018 #NobelPrize in Physiology or Medicine has been awarded jointly to James P. Allison and Tasuku Honjo “for their discovery of cancer therapy by inhibition of negative immune regulation.” pic.twitter.com/gk69W1ZLNI
Нобелеўскую прэмію па медыцыне атрымалі амерыканец Джэймс Элісан і японец Тасуку Хондзё за рэвалюцыйную методыку імунатэрапіі ракавых захворванняў з выкарыстаннем Т-клетак.
Ім удалося выявіць, што імунітэт пацыента можна «настроіць» на барацьбу з анкалагічным захворваннем.
Звычайна імунная сістэма самастойна шукае ў нашым арганізме клеткі, што мутавалі, і знішчае іх, не даючы размножвацца. Аднак ракавыя клеткі знайшлі спосаб абыходзіць гэтую натуральную абарону, што дазваляе пухліне хутка расці.
Многія віды раку робяць гэта, актывуючы механізм, які «супакойвае» імунныя клеткі пасля атакі — так у здаровым арганізме рэгулюецца сіла і працягласць імуннага адказу.
Адкрыццё Элісана і Хондзё зрабіла рэвалюцыю ў лячэнні ракавых захворванняў і легла ў аснову новага класа лекавых прэпаратаў, якія не дазваляюць блакаваць імунны адказ. У выніку арганізм змагаецца з клеткамі-мутантамі натуральным шляхам.
Пакуль што ў гэтых лекаў нямала пабочных эфектаў, аднак яны даказалі сваю эфектыўнасць у барацьбе з анкалогіяй. У некалькіх выпадках дактарам удалося вылечыць пацыентаў нават на позняй стадыі раку, якія да гэтага лічыліся невылечнымі.
У аўторак будзе назавана імя лаўрэата па фізіцы, у сераду па хіміі. У пятніцу — прэміі міру. Літаратурны Нобель сёлета не будзе прысуджацца.