Беларус, якога затрымлівалі за стральбу ў офісе ў Гдыні, падаў сустрэчны пазоў: бо ў яго забралі зброю
Раённая пракуратура ў Гдыні распачала справу аб захопе агнястрэльнай зброі і парушэнні цялеснай недатыкальнасці беларуса Сцяпана Свідзерскага. Заяву падаў сам Свідзерскі, піша tut.by.
Сцяпан Свідзерскі.
Паводле яго слоў, спачатку пракуратура адмовілася распачынаць справу па яго заяве. Гэтае рашэнне было абскарджана ў судзе.
Нагадаем, інцыдэнт са стральбой адбыўся 14 лістапада 2017 года, а 19.00 па польскім часе (у 21.00 — па беларускім) у офісе інфармацыйнага агенцтва Thomson Reuters у Гдыні, дзе малады чалавек працаваў аналітыкам. Ураджэнца Гродна Сцяпана Свідзерскага затрымалі.
Сцяпан у Thomson Reuters больш не працуе. Сябры характарызуюць яго станоўча.
Маладога чалавека абвінавачваюць у замаху на забойства. Абвінавачванне дагэтуль не знятае. Артыкул прадугледжвае санкцыі ад 8 да 25 гадоў пазбаўлення волі альбо пажыццёвае зняволенне.
Сцяпан Свідзерскі лічыць сябе невінаватым у тым, што адбылося. Польскі спартыўна-стралковы клуб Ardea на сваёй старонцы ў Facebook распаўсюдзіў заяву, у якой беларус Сцяпан Свідзерскі распавёў, што займаецца спартыўнай стральбой ужо некалькі гадоў. Ён атрымаў дазвол на зброю, вяртаўся з ёй пасля трэніровак на працу.
Паводле яго слоў, інцыдэнт адбыўся ў момант, калі зброю, якая ляжала ў футарале, узяў у рукі іншы чалавек.
Па словах Сцяпана, па законе ён павінен сачыць за зброяй і ў выпадку страты вымушаны быў бы адказваць. «На жаль, мае паўторныя заклікі пакінуць зброю і вусныя папярэджання былі неэфектыўныя», — пісаў ён.
Сцяпан адзначаў, што чалавек са зброяй аддаляўся і апынуўся блізка да дзвярэй у калідор, такім чынам узнікла небяспека, што ён знікне з поля зроку.
Сцяпан тлумачыў свае дзеянні клопатам пра зброю. Пры гэтым падкрэсліваў, што стрэліў з-за эскалацыі сітуацыі і спецыяльна страляў так, каб нікога не зачапіць нават выпадкова: «Я ні на каго не нападаў, не пагражаў, з самага пачатку інцыдэнту і да канца я прасіў выклікаць паліцыю, каб вырашыць сітуацыю».
