Biełarus, jakoha zatrymlivali za stralbu ŭ ofisie ŭ Hdyni, padaŭ sustrečny pazoŭ: bo ŭ jaho zabrali zbroju
Rajonnaja prakuratura ŭ Hdyni raspačała spravu ab zachopie ahniastrelnaj zbroi i parušeńni cialesnaj niedatykalnaści biełarusa Ściapana Śvidzierskaha. Zajavu padaŭ sam Śvidzierski, piša tut.by.
Ściapan Śvidzierski.
Pavodle jaho słoŭ, spačatku prakuratura admoviłasia raspačynać spravu pa jaho zajavie. Hetaje rašeńnie było abskardžana ŭ sudzie.
Nahadajem, incydent sa stralboj adbyŭsia 14 listapada 2017 hoda, a 19.00 pa polskim časie (u 21.00 — pa biełaruskim) u ofisie infarmacyjnaha ahienctva Thomson Reuters u Hdyni, dzie małady čałaviek pracavaŭ analitykam. Uradženca Hrodna Ściapana Śvidzierskaha zatrymali.
Ściapan u Thomson Reuters bolš nie pracuje. Siabry charaktaryzujuć jaho stanoŭča.
Maładoha čałavieka abvinavačvajuć u zamachu na zabojstva. Abvinavačvańnie dahetul nie źniataje. Artykuł praduhledžvaje sankcyi ad 8 da 25 hadoŭ pazbaŭleńnia voli albo pažyćciovaje źniavoleńnie.
Ściapan Śvidzierski ličyć siabie nievinavatym u tym, što adbyłosia. Polski spartyŭna-strałkovy kłub Ardea na svajoj staroncy ŭ Facebook raspaŭsiudziŭ zajavu, u jakoj biełarus Ściapan Śvidzierski raspavioŭ, što zajmajecca spartyŭnaj stralboj užo niekalki hadoŭ. Jon atrymaŭ dazvoł na zbroju, viartaŭsia ź joj paśla trenirovak na pracu.
Pavodle jaho słoŭ, incydent adbyŭsia ŭ momant, kali zbroju, jakaja lažała ŭ futarale, uziaŭ u ruki inšy čałaviek.
Pa słovach Ściapana, pa zakonie jon pavinien sačyć za zbrojaj i ŭ vypadku straty vymušany byŭ by adkazvać. «Na žal, maje paŭtornyja zakliki pakinuć zbroju i vusnyja papiaredžańnia byli nieefiektyŭnyja», — pisaŭ jon.
Ściapan adznačaŭ, što čałaviek sa zbrojaj addalaŭsia i apynuŭsia blizka da dźviarej u kalidor, takim čynam uźnikła niebiaśpieka, što jon źniknie z pola zroku.
Ściapan tłumačyŭ svaje dziejańni kłopatam pra zbroju. Pry hetym padkreślivaŭ, što streliŭ z-za eskałacyi situacyi i śpiecyjalna stralaŭ tak, kab nikoha nie začapić navat vypadkova: «Ja ni na kaho nie napadaŭ, nie pahražaŭ, z samaha pačatku incydentu i da kanca ja prasiŭ vyklikać palicyju, kab vyrašyć situacyju».
