Нягледзячы на пратэсты апазіцыі, Серж Саргсян абраны прэм’ер-міністрам Арменіі
Сёння на спецыяльным пасяджэнні Нацыянальнага сходу Арменіі 77 галасамі «за», 17 — «супраць» экс-прэзідэнт Арменіі, лідар кіруючай Рэспубліканскай партыі Арменіі (РПА) Серж Саргсян абраны прэм'ер-міністрам Арменіі, паведамляе «Радыё Азатуцюн».
Па новай Канстытуцыі Арменіі прэм'ер-міністр з'яўляецца фактычным кіраўніком выканаўчай улады.
Пасяджэнне парламента Арменіі адбываецца на фоне масавых акцый пратэсту супраць абрання Сержа Саргсяна на пасаду прэм'ер-міністра. Пратэсты ўзначальвае апазіцыйны дэпутат, кіраўнік парламенцкай фракцыі «Елк» і лідар партыі «Грамадзянская дамова» Нікол Пашынян.
Сёння з раніцы тысячы грамадзян у розных частках сталіцы праводзяць акцыі грамадзянскага непадпарадкавання, перакрываюць вуліцы, аднак нягледзячы на намаганні апазіцыі спецыяльнае пасяджэнне парламента ўсё ж адбылося.
