Новыя падрабязнасці трагедыі ў Смаргоні: муж выліў жонцы ў твар кіслату
28 лютага ў Смаргоні адбылася шакуючая гісторыя. 59-гадовы мужчына катаваў жонку, а калі яна збегла, закрыўся ў хаце і забіў сябе.
Мясцовыя жыхары расказвалі, што мужчына выразаў жонцы на лбе нецэнзурнае слова і рэзаў геніталіі.
Гэту інфармацыю не каментуюць ані следчыя, ані пракуратура.
Але намеснік пракурора Смаргонскага раёна Сяргей Кавальчук агучыў новыя падрабязнасці здарэння:
«Паводле папярэдняй версіі, паміж мужам і жонкай адбылася сварка на глебе рэўнасці. У кватэры захоўвалі электраліт — вадкасць на аснове сернай кіслаты для запраўкі акумулятараў. Следства папярэдне высветліла, што мужчына збіў былую жонку, потым плюхнуў электралітам ёй у твар, затым нажом парэзаў ёй сцягно».
У той жа кватэры жыў і дарослы сын пары. Усё здарылася, калі ён ужо сышоў на працу.
Сёння жанчына ў бальніцы. Яна працавала выхавацелькай у мясцовым дзіцячым садку. Мужчына быў беспрацоўным, меў праблемы са здароўем (а па чутках, і з псіхікай). Пара была разведзеная, але жыла разам.
