Staršynioj KDB pryznačany Vakulčyk, u Śledčym kamitecie — Šajeŭ, Łatušku vysłali pasłom

Staršynioj Kamiteta dziaržaŭnaj biaśpieki pryznačany Valeryj Vakulčyk, jaki da hetaha zajmaŭ pasadu staršyni Śledčaha kamiteta. Adpaviedny ŭkaz Alaksandr Łukašenka padpisaŭ 16 listapada.

Vakulčyk kiravaŭ Śledčym kamitetam ad času jaho zasnavańnia, z 24 kastryčnika 2011 hoda.

Da hetaha, z maja 2008 hoda, jon uznačalvaŭ Apieratyŭna-analityčny centr pry prezidencie.

Naradziŭsia 19 červienia 1964 hoda ŭ Bresckaj vobłaści.

Skončyŭ Charkaŭskaje Hvardziejskaje vyšejšaje tankavaje kamandnaje vučylišča (1985), Vyšejšyja kursy vajskovaj kontrvyviedki KDB SSSR (1992), Akademiju kiravańnia pry prezidencie Biełarusi (2011).

47-hadovy Vakulčyk staŭ adnym ź pieršych uradžencaŭ Biełarusi na čale vialikaj siłavoj struktury.

Jon maje reputacyju zakońnika. Na jahony čas pracy ŭ Apieratyŭna-analityčnym centry prypała pryniaćcie normaŭ, što rehulujuć internet. Jany byli davoli prahresiŭnymi i nie abmiežavalnymi.

Što cikava, usiaho tydzień tamu hienierał Malcaŭ zajaviŭ, što šef KDB Zajcaŭ moža viarnucca na svaju pasadu.

«Vykonvać abaviazki staršyni KDB daručana mnie. Ale heta nie značyć, što Vadzim Zajcaŭ paśla zaviaršeńnia rasśledavańnia nie moža viarnucca na hetuju pasadu.

«Kali rasśledavańnie pakažuć kampietentnaść jaho i inšych słužbovych asob, to pa-za ŭsialakimi sumnievami jon budzie viernuty na hetuju pasadu. Heta zroblena dla taho, kab rasśledavańnie było praviedziena maksimalna abjektyŭna, — kazaŭ Leanid Malcaŭ. — Rasśledavańnie daručana pravodzić hienieralnamu prakuroru. Taksama da hetaj pracy budzie dałučany Śledčy kamitet».

I voś kiraŭnik Śledčaha kamiteta siadaje na miesca taho, kaho praviaraŭ.

Novym kiraŭnikom Śledčaha kamiteta pryznačany Valancin Šajeŭ.

Jon pracavaŭ (jahonaje intervju — pa spasyłcy) namieśnikam Vakulčyka ŭ Śledčym kamitecie, a da taho — prakuroram Homielskaj vobłaści.

Jak daŭno čakałasia, Pavał Łatuška pryznačany pasłom u Francyju i pry JUNESKA.

Łatuška trapiŭ va ŭrad z pasady pasła ŭ Polščy na chvali «adlihi» 2008–2010 hadoŭ. Jamu ŭdałosia da peŭnaj miery źmianić palityku ŭ śfiery kultury.

Ciapier ličba biełaruskamoŭnych ministraŭ iznoŭ apuściłasia da nula.

Mikoła Buhaj

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH