Realnyja prybytki biełarusaŭ praciahvajuć padać
Realnyja najaŭnyja hrašovyja prybytki biełarusaŭ pa-raniejšamu ŭ minusie. U pieršym paŭhodździ hety pakazčyk źniziŭsia na 0,8% da anałahičnaha pieryjadu minułaha hoda, paviedamlaje Biełstat.
Tolki ŭ Minskaj vobłaści realnyja najaŭnyja hrašovyja prybytki za pieršyja 6 miesiacaŭ hetaha hoda vyraśli (1,2%). U astatnich rehijonach hety pakazčyk upaŭ, bolš za ŭsio - u Viciebskaj vobłaści (-2,8%). Dla paraŭnańnia: u stalicy realnyja najaŭnyja hrašovyja prybytki skaracilisia ŭ studzieni-červieni na 0,9% da anałahičnaha pieryjadu minułaha hoda.
U ahulnym abjomie hrašovych prybytkaŭ apłata pracy zajmaje 61,9%, prybytki ad pradprymalnickaj i inšaj dziejnaści, jakaja prynosić prybytak, - 8,1%, tranśfierty nasielnictvu (piensii, dapamohi, stypiendyi i inšyja tranśfierty nasielnictvu) - 24,4%, prybytki ad ułasnaści i inšyja prybytki - 5,6%.
Nahadajem, realnyja prybytki biełarusaŭ padajuć na praciahu ŭsiaho hetaha hoda. U studzieni hety pakazčyk skaraciŭsia na 4,5% da anałahičnaha pieryjadu minułaha hoda, u studzieni-lutym - na 3,2%, u studzieni-sakaviku - na 2,2%, a ŭ studzieni-krasaviku - na 1,5%.
Letaś realnyja prybytki biełarusaŭ pakazali samaje mocnaje padzieńnie za apošnija 10 hadoŭ.
Na dumku ministra ekanomiki Uładzimira Zinoŭskaha, vosieńniu realnyja prybytki biełarusaŭ pavinny vyjści ŭ plus.
- Ja dumaju, što my ŭ najbližejšaj budučyni, naprykład, ad vieraśnia, moža być, pa listapada, vyjdziem na stanoŭčyja vyniki hrašovych prybytkaŭ nasielnictva, i heta vielmi važny praces, - zajaviŭ Uładzimir Zinoŭski.
U 2018 hodzie, na dumku dyrektara Daśledčaha centra IPM Alaksandra Čubryka, realnyja prybytki biełarusaŭ mohuć pavialičycca. Pa bazavym scenary - pry pastaŭcy z Rasii ŭ Biełaruś 23 młn ton nafty ŭ hod - na 8,1%, a pa alternatyŭnym - pry pastaŭcy 18 młn ton nafty - na 7,3%.
Realnyja najaŭnyja hrašovyja prybytki nasielnictva - adzin z hałoŭnych ekanamičnych pakazčykaŭ, pa jakich vyznačajecca dabrabyt hramadzian. Jon raźličvajecca šlacham dzialeńnia naminalnych tempaŭ rostu najaŭnych hrašovych prybytkaŭ na indeks spažyvieckich cen za adpaviedny časavy pieryjad.
