KDB patrapiŭ pad skaračeńnie
Kamitet dziaržaŭnaj biaśpieki pieražyvaje hłabalnyja strukturnyja turbacyi i skaračeńni. U centralnym aparacie śpiecsłužby rearhanizavany hłaŭki, a na nizavym uzroŭni płanujecca likvidacyja terytaryjalnych padraździaleńniaŭ, piša biełaruski błohier d-zholik.
U dadatak da ŭžo isnujučych u centralnym aparacie KDB stvorana novaje hałoŭnaje ŭpraŭleńnie śpiecyjalnych mierapryjemstvaŭ i daśledavańniaŭ.
Hałoŭnaje ŭpraŭleńnie ekanamičnaj biaśpieki KDB rearhanizavana ŭ hałoŭnaje ŭpraŭleńnie pa kontrvyviedvalnym zabieśpiačeńni abjektaŭ ekanomiki.
Hałoŭnaje ŭpraŭleńnie pa kontrvyviedvalnym zabieśpiačeńni pravaachoŭnych i kantralujučych orhanaŭ, baraćbie z karupcyjaj i arhanizavanaj złačynnaściu KDB, jakoje ź lipienia 2009 hoda pa studzień 2012 hoda ŭznačalvaŭ ciapierašni ministr unutranych spraŭ Ihar Šunievič, rearhanizavana ŭ hałoŭnaje ŭpraŭleńnie pa kontrvyviedvalnym zabieśpiačeńni pravaachoŭnych i kantralujučych orhanaŭ.
Apošnija hady ŭ KDB fiksavaŭsia vostry deficyt kadravaha składu i kratnaje źnižeńnie kolkaści vypusknikoŭ viedamasnaha Instytuta nacyjanalnaj biaśpieki, jakija pastupali na apieratyŭnuju pracu ŭ padraździaleńni. Piać hadoŭ tamu arhanizacyja navat była vymušana abviaścić adkryty nabor na słužbu pa kantrakcie ŭ orhany dziaržbiaśpieki.
A ŭ 2013 hodzie ŭ chodzie pieršaj chvali aptymizacyi dziaržaŭnaha aparatu Łukašenka zaŭziata abaraniaŭ viedamstva: «U KDB užo niama čaho skaračać. Ja nie chaču ličby hetyja nazyvać, tam niama čaho skaračać, navat prybiralščycu nie skarociš. Bo daŭno abrezali».
Prajšło nie tak šmat času, a na ŭzroŭni kiraŭnictva ŭžo zaćvierdžany płany pa skaračeńni (likvidacyi) mižrajonnych adździaleńniaŭ KDB, jakija isnavali ŭ abłaściach za časami SSSR. Ich zony adkaznaści płanujuć pieradać terytaryjalnym padraździaleńniam orhanaŭ KDB u haradach abłasnoha padparadkavańnia i bujnych administracyjnych centrach.