Jakich źmienaŭ u zakanadaŭstvie, što rehuluje dziejnaść PVT, najbolš čakajuć mieniedžary IT-siektara — apytańnie
Prajekt novaha dekreta ab dziejnaści Parka vysokich technałohij uzrušyŭ jak biełaruskich ajcišnikaŭ, tak i ekśpiertnuju supolnaść. Ale mała chto bačyŭ sam prajekt dekreta, tamu «Naša Niva» vyrašyła zapytacca ŭ biełaruskich IT-mieniedžaraŭ roznaha źviana, jakich źmien zakanadaŭstva, što rehuluje dziejnaść PVT, jany najbolš čakajuć.
Leanid Łoźnier, suzasnavalnik JePAM
Abmierkavańnie, časam haračaje, mahčymych źmianieńniaŭ u pravavym statusie PVT patrabuje, pierš za ŭsio, udakładnieńnia niekalkich važnych paniaćciaŭ. Što takoje IT-siektar? Davajcie pahladzim na Amazon, Google, Apple i Rovio (kampanija, jakaja stvaryła hulniu Angry Birds).
Amazon atrymlivaje asnoŭny dachod ad handlovaj dziejnaści.
Google atrymlivaje asnoŭny dachod ad raźmiaščeńnia rekłamy.
Apple atrymlivaje asnoŭny dachod ad prodažu elektronnych vyrabaŭ.
Rovio atrymlivaje asnoŭny dachod ad prodažu zabaŭ.
Usie hetyja kampanii možna adnieści da IT-siektaru (chacia mnie bolš padabajecca paniaćcie «ličbavaja ekanomika»). Siońnia hetyja kampanii prosta nie zdoleli b stać rezidentami PVT z-za isnujučych tam abmiežavańniaŭ na vidy dziejnaści. Ale kali vydzielić z hetych kampanij «instrumientalny cech», to bok raspracoŭku prahramnaha zabieśpiačeńnia, na jakim i pracuje «metavy biznes», to taki instrumientalny cech, aformleny jak asobnaja jurydyčnaja asoba, zmoža stać rezidentam PVT. Čym heta abaročvajecca? Tym, što enierhičny talenavity pradprymalnik vynosić svoj metavy biznes za miežy našaj krainy, pakidajučy tut tolki instrumientalny cech. Časam i sam pradprymalnik pieramiaščajecca ŭ inšuju jurysdykcyju.
Ja chacieŭ by padkreślić, što prablema z vybaram jurysdykcyi dla metavaha biznesu źviazanaja nie z adsutnaściu prefierencyj, a z pryncypovymi abmiežavańniami dziejnaha zakanadaŭstva.
Hałoŭnaj źmienaj u jurydyčnym režymie pracy PVT budzie mahčymaść dla kampanij-rezidentaŭ stać paŭnavartasnymi dziejnymi asobami ŭ siońniašniaj ličbavaj ekanomicy. Dahavornyja adnosiny zmohuć budavacca biez zališniaj papiarovaj farmalizacyi. Mnie nie chaciełasia b pahłyblacca ŭ detali abmierkavańnia jurydyčnych akaličnaściej, tym bolš što ja nie juryst. Ale sutnaść mienavita ŭ hetym.
Na moj pohlad, heta stvaraje cudoŭny šaniec (mienavita šaniec, treba jašče šmat pracavać, kab usio ažyćciavić) taho, što viadomyja pradukty ličbavaj ekanomiki viernucca dadomu, to bok da nas. I padatkaabkładańnie ŭsiaho poŭnaha biznes-cykła, a nie tolki instrumientalnaha cecha, budzie adbyvacca mienavita ŭ Biełarusi. Tym samym stvarajucca pieradumovy dla pašyreńnia padatkaabkładanaj bazy. Heta značyć, što ŭ vyjhryšy budzie ŭsia ekanomika.
Krytyki kažuć, što takija ž umovy treba stvarać dla ŭsioj ekanomiki. Nielha nie pahadzicca, ale davajcie nie hublać pačućcia realnaści. Tym bolš razvažać z pazicyi «kali nie ŭsim, dyk lepiej užo nikomu».
Biznes epochi ličbavaj ekanomiki nie prosta budzie prycisnuty va ŭmovach tradycyjnaj papiarovaj spravazdačnaści — jon paprostu stanie niemahčymy. I ad hetaha ŭžo dakładna nichto nie vyjhraje.
Siarhiej Kirejkaŭ, prahramist Exadel
PVT u nas dobra ŭpisvaŭsia ŭ miascovuju rečaisnaść — isnavaŭ, ale mała rabiŭ pa sutnaści. Byŭ prosta zakrytym kłubam dla vialikich hulcoŭ. Viedaju jak minimum adnu kampaniju, jakaja ščyra chacieła stać rezidentam PVT, ale patraciła na heta 2 hady. PVT pavinien być bolš adkrytym, jon pavinien pryciahvać novych udzielnikaŭ, a nie stvarać dadatkovyja abmiežavańni.
Chaciełasia b, kab i sama Biełaruś stała bolš adkrytaj dla inviestycyj i prostaj dla biznesu. Viadoma, tak pavinna być va ŭsich śfierach, ale niabłaha było b pačać chacia b z IT.
Niedzie 8 hadoŭ tamu ja pracavaŭ niepasredna na zamoŭcaŭ z ZŠA. Jany ščyra chacieli adkryć u Biełarusi ofis, ale kali daviedalisia, što dla hetaha nieabchodna, — admovilisia.
Pryciahnieńnie inviestycyj i stvareńnie novych pracoŭnych miescaŭ paŭpłyvajuć na ŭzrovień dachodaŭ asobnych hramadzian i ŭsioj krainy. My zmožam palepšyć svoj imidž, što dapamoža pryciahnuć inviestycyi nie tolki ŭ IT-siektar.
Kali ekśpierymient stanie paśpiachovym, to jon zmoža być prykładam taho, jak spraščeńnie praviłaŭ hulni i debiurakratyzacyja spryjajuć raźvićciu nie tolki asobnaha siektara, a i ŭsioj ekanomiki.
Michaił Dubakoŭ, vykanaŭčy dyrektar Targetprocess
U pieršuju čarhu ŭ Biełarusi pavinna spraścicca pracedura adkryćcia praduktovych kampanij. Dla hetaha nieabchodna prybrać davoli dziŭnyja abmiežavańni, naprykład, na prodaž dadatkaŭ praz AppStore ci atrymańnie dachodaŭ ad rekłamy.
Akramia taho, treba stvaryć mahčymaści dla pracy ŭ krainie vienčurnych fondaŭ. Heta praca na palapšeńnie imidžu krainy i lohkaść strukturavańnia ŭhod (apcyjony, padatkovyja lhoty na prodaž intelektualnaj ułasnaści, harantyja pryvatnaj ułasnaści).
Taksama vielmi nieabchodna maksimalna spraścić mihracyjnyja praviły dla śpiecyjalistaŭ ź inšych krain, bo deficyt vysokakvalifikavanych kadraŭ mocna adčuvajecca.
Dla krainy samaje važnaje — adukacyja. Tamu było b vydatna, kali b PVT, naprykład, moh adkryć svaje škoły, univiersitet, a taksama aktyŭna ŭdzielničać u stvareńni školnaj prahramy pa ŭsioj krainie. Dziaržava pavinna padychodzić kompleksna da raźvićcia dziaciej, a taksama ŭličvać nieabchodnaść pažyćciovaj adukacyi ŭ šmatlikich prafiesijach.
Ja vitaju lubyja źmieny, jakija spraščajuć ci stymulujuć raźvićcio vysokatechnałahičnych halin. Vidavočna, što za imi budučynia. Tamu nieabchodna sprabavać i hladzieć, što pracuje, a što nie.
Juryj Zisier, zasnavalnik TUT.BY
Mnie padabajucca ŭsie źmieny, zakładzienyja ŭ prajekt dekreta. Usie jany nakiravanyja na vyhadu krainie, asabliva stvareńnie ŭmoŭ dla kampanij, jakija zajmajucca praduktovym prahramavańniem i rekłamaj, a nie tolki aŭtsorsinham, jak ciapier. Važna, kab paśla ŭzhadnieńnia ź dziasiatkami dziaržaŭnych orhanaŭ ad prajekta nie zastalisia rožki dy nožki.
