Miedyki prapanoŭvajuć zrabić bolš žorstkaj adkaznaść baćkoŭ za pakinutych biez nahladu dziaciej
Sioleta ŭ RNPC dziciačaj chirurhii ŭ Minsku sa stravavodaŭ dziaciej dastali batarejek, maniet, šrubak i šarykaŭ bolš, čym za ŭvieś minuły hod, piša Tut.by. Miedyki bjuć tryvohu: statystyka pa inšarodnych pradmietach i bytavoj chimii, jakuju hłytajuć dzieci, raście, pry hetym, ličać jany, baćki nie ŭśviedamlajuć prablemy.
RNPC dziciačaj chirurhii. Fota: Alaksandr Vasiukovič, TUT.BY
Kanstancin Drazdoŭski, dyrektar RNPC dziciačaj chirurhii, hałoŭny pazaštatny dziciačy kardyjachirurh Biełarusi, pryvioŭ, pa jaho słovach, «žudasnuju statystyku»: za siem miesiacaŭ hetaha hoda tolki ŭ ich centry z nahody inšarodnych pradmietaŭ ahladali 171 dzicia. Pry hetym, kali ŭ 2015 hodzie lekary centra praviali 26 apieracyj pa vymańni takich pradmietaŭ, u 2016 hodzie, kali ŭ Biełarusi źjavilisia maniety, — 86 apieracyj, to sioleta — užo 91.
— Praktyčna za paŭhoda my atrymali stolki inšarodnych cieł, kolki za ŭvieś minuły hod. Možna kolki zaŭhodna doŭha raspaviadać pra toje, nakolki heta važnaja tema, ale kali pryvodziać ličby — zališnija jakija-niebudź kamientary, — zaŭvažyŭ jon.
Pry hetym pa ŭsioj krainie za siem miesiacaŭ hetaha hoda praviali 137 apieracyj pa vymańni inšarodnych cieł u dziaciej, i troje ź ich stali invalidami.
— Dziakuj Bohu, nichto nie pamior, ale dziaciej pa žyćci čakaje vialikaja kolkaść pracedur pad narkozam i apieracyj. Stravavod u hetych dziaciej niezvarotna paškodžany, — skazaŭ Drazdoŭski i nahadaŭ, što ŭ niekatorych vypadkach stravavod davodzicca vydalać i rabić transpłantacyju.
Pa słovach miedyka, baćki, na žal, pakul nie razumiejuć usiu surjoznaść prablemy.
— My nie možam nie reahavać na hetaje źmianieńnie ličbaŭ. Trapleńnie inšarodnaha cieła ŭ stravavod, straŭnik, u zaležnaści ad taho, jakoje heta inšarodnaje cieła, moža pryvieści až da śmierci dziciaci. Takija vypadki jość, i vy ŭsie pra ich vydatna viedajecie, — praciahnuŭ jon.
Lekar nahadaŭ, što niekatoryja pradmiety mohuć vyjści naturalnym šlacham. Naprykład, niejkija šklanyja šaryki, mietaličnyja pradmiety. Ale kab dastać batarejku, manietu, šrubu abo vostry askołak škła, patrebnaja dapamoha śpiecyjalista.
Kanstancin Drazdoŭski źviarnuŭ uvahu, što ciažkija nastupstvy ŭźnikajuć, kali dzicia hłynaje płoskuju batarejku dyjamietram kala dvuch santymietraŭ. Jana zachrasaje ŭ druhim zvužeńni stravavoda na ŭzroŭni aorty i moža paškodzić jak sam stravavod, tak i aortu. Pry vydaleńni stravavoda dzicia moža pamierci ad kryvacioku.
«Mini-muziej» ad dziciačych chirurhaŭ. Usie hetyja pradmiety prahłynali dzieci
Kanstancin Drazdoŭski raspavioŭ, što jašče adna prablema — apioki stravavoda ŭ dziaciej. Jany hłytajuć doma rečyvy bytavoj chimii, marhancoŭku, ale samy niebiaśpiečny ŭ hetym sensie — srodak dla pračystki kanalizacyi.
U 2016 hodzie ŭ RNPC dziciačaj chirurhii pastupiła 38 dziaciej z apiokami stravavoda, za siem miesiacaŭ 2017 hoda — 67 dziaciej, dzieviać ź ich stali invalidami.
Pry hetym prablema z apiokami stravavoda i hłytańniem inšarodnych pradmietaŭ dziećmi asabliva vostra adčuvajecca letam, kali jany nie chodziać u škołu.
Dyrektar RNPC dziciačaj chirurhii adznačyŭ, što niahledziačy na toje, što ŭ ich jość sučasnaje abstalavańnie, kab akazać dapamohu ŭ takich vypadkach, nichto nie zdymaje adkaznaści z baćkoŭ. Miedyki ŭžo padrychtavali prapanovu, jakuju buduć uzhadniać ź Ministerstvam achovy zdaroŭja i inšymi zacikaŭlenymi ministerstvami. Jana ŭ tym liku tyčycca adkaznaści baćkoŭ za toje, što zdaryłasia.
Akramia hetaha miedyki prapanujuć vypuskać pradmiety bytavoj chimii ŭ Biełarusi z admysłovymi korkami-zamkami ad dziaciej, a jomistaści z ahresiŭnymi vadkaściami rabić ciomnaha koleru, kab jany nie pryciahvali ŭvahu. Jon nahadaŭ, što taksama važna, kab baćki nie pieralivali bytavuju chimiju ŭ inšyja jomistaści. I pryvioŭ prykład, što ciapier u RNPC lažyć chłopčyk z apiokam stravavoda, jaki, pierabłytaŭšy, vypiŭ vadkaść z butelki z etykietkaj «Śniažok».
