Zasnavalnik ruchu «Antymajdan. Biełaruś» ciapier žyvie ŭ Polščy: Maje pohlady mocna źmianilisia da lepšaha
Žan Čubukoŭ u minułym prasłaviŭsia svajoj dziejnaściu ŭ supolnaści «Antymajdan. Biełaruś» razam ź Ivanam Usam, synam eks-kandydata ŭ prezidenty. Taksama Čubukoŭ byŭ aŭtaram pietycyi pa zabaronie bieł-čyrvona-biełaha ściaha jak «nacysckaha simvała», pazicyjanavaŭ siabie jak prarasijskaha analityka. Siońnia mužčyna žyvie ŭ Polščy, pracuje mieniedžaram ŭ IT i pryznajecca, što jaho pohlady evalucyjanavali.
Na fonie źlitaj bazy danosaŭ u KDB Žan Čubukoŭ zaklikaŭ biełarusaŭ spampavać danyja i pravieryć, ci niama danosaŭ na ich.
«Rekamienduju spampavać bazu i pravieryć, stukali na vas i vašych blizkich ci nie. I zaadno daviedacca, chto mienavita. Tamu što ciapier razzłavanyja jabaćki mohuć rabić heta randomna i prosta z zajzdraści», — napisaŭ jon u siecivie.
Žan Čubukoŭ pačynaŭ prafiesijnuju dziejnaść u miedycynie, atrymaŭšy adukacyju doktara-terapieŭta. Skončyŭ mahistraturu i aśpiranturu pa śpiecyjalnaści «Patałahičnaja fizijałohija». Paśla hetaha Čubukova paciahnuła ŭ palityku: jon advučyŭsia ŭ Akademii kiravańnia na «Palityčnym analizie. Palityčnych technałohijach u miedyjaśfiery». Paźniej pierajšoŭ u IT na pasadu sistemnaha analityka, siońnia pracuje mieniedžaram. Fota: fejsbuk
Supraćpastaŭleńnie svajoj piersony jabaćkam vyklikała pytańnie ŭ niekatorych karystalnikaŭ interneta z ulikam dziejnaści Žana ŭ minułym.
Tak, u 2011 hodzie Čubukoŭ zaśviaciŭsia ŭ dziejnaści rasijskaha virtualnaha kłuba «Sutnaść času». Kłub pravodziŭ kibierataki suprać maŭklivych pratestaŭ, jakija prachodzili ŭ Biełarusi paśla vybaraŭ-2010, a taksama suprać akcyi «Stop-bienzin». Asablivaściu hetaha kłuba była nastalhija pa SSSR. U svaim statucie aktyvisty pisali, što krach Sajuza — heta ich asabistaja trahiedyja.
Čubukoŭ taksama staŭ adnym z administrataraŭ supołki «My suprać aranžavaj revalucyi ŭ Biełarusi!», dzie padrabiazna raskazvaŭ, naprykład, što varta rabić, kab atakavać tvitary «kaardynataraŭ aranžavych». Siońnia hetaja supołka va UKantakcie praciahvaje tranślavać rytoryku prapahandystaŭ i siłavikoŭ.
Čubukoŭ dazvalaŭ sabie nazyvać stvaralnikaŭ BNR radykalnymi nacyjanalistami i dyktatarami, jakija chacieli ŭmacoŭvać svaju ŭładu z dapamohaj akupantaŭ. A tych, chto vychodziŭ śviatkavać Dzień Voli — «nacystami, jakija apahańvajuć pamiać kožnaha čaćviortaha žychara, jaki byŭ zabity nacystami i ich chaŭruśnikami».
U pietycyi ž suprać bieł-čyrvona-biełaha ściaha na imia tahačasnaha ministra infarmacyi Aleha Pralaskoŭskaha mužčyna davodziŭ:
«My, hramadzianie Biełarusi i hramadzianskija aktyvisty braterskich narodaŭ, asudžajem radykalny biełaruski nacyjanalizm i pryraŭnoŭvajem jaho da nacyzmu. Vykarystańnie nacysckaj simvoliki i rytoryki my pryraŭnoŭvajem da prajaŭ ekstremizmu i žadajem aficyjnaha jurydyčnaha zaćviardžeńnia takich pohladaŭ jak elemienta dziaržaŭnaj palityki Biełarusi».
Hetuju pietycyju ŭ 2013 hodzie padpisała 196 čałaviek.
Ciapier Žan publična pryznaŭsia, što jaho pohlady źmianilisia.
«Nakont pietycyi… Nu tak, było. Było i horš navat. Bo ja čałaviek praaktyŭny i emacyjny. Druhoje pytańnie, što za hetyja nikčemnyja 11 hod maje pohlady vielmi mocna źmianilisia da lepšaha», — adkazaŭ jon adnamu z karystalnikaŭ, jaki kapnuŭ jaho minułaje.
Skrynšot: dev.by
«Naša Niva» źviazałasia z Žanam z prośbaj dać bolš razhornuty kamientar pra pryčyny, jakija paŭpłyvali na źmienu jaho palityčnych pohladaŭ, ale pakul my nie atrymali adkazu. Kali heta zdarycca, my apublikujem jaho asobna.
Čytajcie taksama:
