Archieołahi znajšli manastyrskuju piačatku Jefrasińni Połackaj FOTA
U čas restaŭracyjna-archieałahičnych rabot kala paŭdniovaj ściany Spasa-Praabraženskaha chrama Połackaha Spasa-Jefrasińnieŭskaha manastyra znojdzienaja piačatka (CHII stahodździe) najpadobnaj Jefrasińni. Pra heta paviedamlaje BIEŁTA sa spasyłkaj na aficyjny partał Biełaruskaj pravasłaŭnaj carkvy.
church.by
Piačatka dvuchbakovaja. Z adnaho boku — vyjava najpadobnaj Jefrasińni Aleksandryjskaj — patranesy najpadobnaj Jefrasińni Połackaj. U adnoj ruce ŭ jaje kryž, druhaja — padniataja ŭ błasłaŭlalnym žeście. Pavodle słoŭ dacenta kafiedry ŭsieahulnaj historyi i mietodyki vykładańnia historyi BDPU imia Maksima Tanka, kandydata histaryčnych navuk Iny Kalečyc, znojdzienuju piačatku možna atrybutavać jak prynaležnuju najpadobnaj Jefrasińni Połackaj. Navukoviec źviarnuła ŭvahu na nadpis «Ijefrosińja» pa abodvuch bakach vyjavy.
«Kali pišacca ab samoj najpadobnaj Jefrasińni Połackaj — pišacca «Ofrosińja», vidać, kab adroźnić. «Ofrosińja» — tak, chutčej za ŭsio, najpadobnuju nazyvali. Pa kruzie išoŭ nadpis, jaki pavinien byŭ čytacca jak «Hospodi, pomozi rabie Svojej Ofrosińje na mnohaja leta». Zastaŭsia tolki nievialiki kavałačak «na mnohaja leta». Astatni nadpis i lik naŭmysna byli sapsavanyja niejkim śpiecyjalnym instrumientam. Mahčyma, atrymaŭsia nie vielmi ŭdačny adbitak piačatki», — raskazała Ina Kalečyc.
Z advarotnaha boku piačatki vyjava Chrysta Zbaviciela «Pantakratar», jakaja praktyčna poŭnaściu supadaje z vyjavaj, što znachodzicca ŭ Spasa-Praabraženskim chramie Połackaha manastyra na frescy. «Takim čynam, heta piačatka i najpadobnaj, i piačatka manastyra», — dadała śpiecyjalist.
Piačatku znajšoŭ viadučy navukovy supracoŭnik navukova-restaŭracyjnaha adździeła Połackaha historyka-kulturnaha muzieja-zapaviednika Alaksandr Sałaŭjoŭ. Znachodku buduć daśledavać navukoŭcy roznych śpiecyjalnaściej. «Heta visłaja piačatka, takija zvyčajna pryviešvali da dakumientaŭ taho času, kali pieraviazvali, kab nichto ich nie pračytaŭ. Unutry prapuskaŭsia špahat. Piačatka była znojdzienaja ŭ adkrytaj hetym letam hrabnicy-arkasolii», — raskazaŭ Alaksandr Sałaŭjoŭ.
Čytajcie taksama: