Piać biełarusaŭ trapili ŭ rasijski śpis terarystaŭ i ekstremistaŭ. Chto jany?
U siaredzinie červienia byŭ apublikavany novy rasijski śpis ekstremistaŭ i terarystaŭ. U im znachodziacca jak hramadzianie Rasii, hetak i zamiežniki.
U śpisie znajšłosia piaciora biełarusaŭ. Admietna, što ŭsie jany źmieščanyja ŭ śpis «rasijskich fizičnych asoboŭ». Heta značyć, što svaju dziejnaść jany viali na terytoryi Rasii. Hetak sama ŭ śpisie bahata ŭkraincaŭ, hruzinaŭ, pradstaŭnikoŭ inšych nacyjanalnaściaŭ. Ahułam u hety śpis trapiła bolš za 7 tysiač čałaviek.
Kirył Silivončyk
Samy viadomy ź fihurantaŭ śpisu. Kirył Silivončyk — uradženiec vioski Zdudzičy Śvietłahorskaha rajona. Pa ironii losu, adtul taksama pachodziać były staršynia KDB Ściapan Sucharenka i eks-kiraŭnik ANT Ryhor Kisiel.
Silivončyk pracavaŭ sistemnym administrataram na abarončym pradpryjemstvie ŭ Nižnim Noŭharadzie. U śniežni 2014 hoda jon byŭ aryštavany za reposty praŭkrainskich supołak Ukantakcie.
Maskoŭski vajskovy akružny sud asudziŭ Silivončyka da dvuch hadoŭ kałonii-pasialeńnia pa artykule 205.2 «Publičnyja zakliki da ažyćciaŭleńnia terarystyčnaj dziejnaści». U śniežni 2016 Silivončyk viarnuŭsia ŭ Biełaruś.
Dźmitryj Paŭłaŭ
Stvaralnik ultrapravaj arhanizacyi Misantropic Division Belarus. Hetaja arhanizacyja prapahanduje nacysckija pohlady, filijały MD jość pa ŭsioj Jeŭropie. Paŭłaŭ šmat dapamahaŭ dobraachvotnym ukrainskim bataljonam na ŭschodzie Ukrainy.
Sam Paŭłaŭ pracavaŭ u adździele licenzijavańnia EPAM Systems. U Biełarusi jaho niekalki razoŭ zatrymlivali supracoŭniki siłavych viedamstvaŭ, ale tak i nie vystavili kryminalnaje abvinavačvańnie.
U vyniku Paŭłaŭ razam z žonkaj źjechaŭ u Hiermaniju. Niekalki razoŭ u rasijskich ŚMI zapuskalisia fejki ab śmierci Paŭłava, ale jany nie paćvierdzilisia.
Alaksandr Šahun
Litaralna 19 lipienia Navasibirski abłasny sud apraŭdaŭ 25-hadovaha ŭradženca Smarhoni. Hetaja sprava ciahnułasia bolš za 4 hady.
Šahuna abvinavačvali ŭ prapahandzie ekstremizmu. Sprava tyčyłasia dopisaŭ u sacyjalnych sietcy Ukantakcie ŭ pieryjad ad 2008 da 2010. Heta byli videa i hrafičnyja materyjały, što tyčylisia ku-kłus-kłana, Hitlera.
Kryminalnaja sprava była zaviedzienaja pa artykule 282.1 «Uzbudžeńnie nianaviści albo varožaści». «Tam byli dastatkova dalikatnyja rečy. Kali jany vyjduć vonku, to budzie vyhladać niadobra», — zapeŭniŭ advakat Šahuna.
U mai 2015 hoda Šahuna asudzili da 240 hadzin abaviazkovych rabot. Adnak sprava była nakiravanaja na pierarazhlad. Sioleta Šahuna apraŭdali.
Baćka Šahuna kaža, što synu hetaj «sfabrykavanaj» spravaj złamali žyćcio. Jon byŭ vymušany syści ź piataha kursa ŭniviersiteta, nie trapiŭ u vojska, nie znajšoŭ pracu, a taksama ŭsie čatyry hady nie moh vyjazdžać z Navasibirska.
Pavieł Novikaŭ
31-hadovy ŭradženiec Homiela. Na jahonych staronkach u sacyjalnych sietkach staić karacieńki status «Siadžu». Pry hetym Pavieł zredku ŭmudrajecca navat pościć fotazdymki turemnaha bytu. Mahčyma, heta tak zvanaja «chimija», tamu režym bolš volny.
Svajaki Paŭła Novikava žyvuć u Biełarusi i Rasii. Nichto ź ich nie choča razmaŭlać pra padrabiaznaści kryminalnaj spravy. «My ničoha nie viedajem», — u adzin hołas kažuć jany. U Biełarusi ŭ vioscy žyvie mama Paŭła.
Kali prahladzieć supołki, na jakija padpisany Novikaŭ, to tam niama ni palityčnych, ni nacysckich. Heta ŭ asnoŭnym supołki kštałtu «Terytoryja sapraŭdnych mužčyn», a taksama padpiski na pryhožych dziaŭčat. Miesca žycharstva Novikava paznačanaja Maskva.
Statusy taksama nie samyja admietnyja: «Ja kajfuju». Praz paŭtara miesiaca: «Usio, nie chaču bolej kajfavać. Stamiŭsia».
Alaksandr Žalazinski
Pra piataha biełaruskaha ekstremista nieviadoma ŭvohule ničoha, aproč taho, što jamu 31 hod i rodam z Kalinkavičaŭ Homielskaj vobłaści.
