U Minsku projdzie 12 adkrytych lekcyj pra biełaruskich paetaŭ 1930-ch
Ciaham vosieni ŭ miežach prajektu «(Nie) rasstralanaja paezija» znaŭcy biełaruskaj litaratury razam z muzykami raspaviaduć pra paetaŭ, čyj šlach byŭ hvałtoŭna spynieny 80 hod tamu.
Kožny ź litaraturnych ekśpiertaŭ praviadzie pa dźvie lekcyi ciaham vieraśnia-listapada ŭ kniharni «Łohvinaŭ». Hanna Sieviaryniec rychtujecca raspavieści pra Michasia Čarota i Alesia Dudara, Andrej Chadanovič — pra Julija Taŭbina i Todara Klaštornaha, Alaksiej Strelnikaŭ — pra Michasia Zareckaha i Uładzisłava Hałubka, Volf Rubinčyk — pra Izi Charyka i Majsieja Kulbaka, Viktar Žybul — pra Jurku Lavonnaha i Ziamu Pivavarava, Anton Rudak — pra Anatola Volnaha i Valeryja Marakova.
«My chočam zrabić hetyja viečaryny ŭ nadzvyčaj cikavym farmacie, tamu prosim šanoŭnych lektaraŭ źviarnuć uvahu na małaviadomyja momanty z žyćcia paetaŭ i na tyja ich tvory, jakija byli zabytyja paśla rasstrełu aŭtaraŭ. My chočam zrazumieć, jakimi jany byli ludźmi, čym žyli i natchnialisia, čym uražvali i aburali tych, chto byŭ pobač ź imi. I tym samym śćvierdzić, što pamiaci pra hetych tvorcaŭ nakanavana žyć dalej, jak by tam niechta nie chacieŭ inakš», — zaznačaje pradziusar prajektu Siarhiej Budkin.
U lekcyjach taksama voźmuć udzieł muzyki, jakija ŭ kamiernym farmacie ŭpieršyniu zajhrajuć pieśni, napisanyja na słovy represavanych tvorcaŭ. U miežach lekcyj zapłanavanaja prezientacyja «maŭklivych knihaŭ», jakija najpierš atrymajuć tyja, chto padtrymaŭ prajekt na Talaka.by.
Usie 12 lekcyj buduć demanstravacca on-łajn: kožnaja ź ich praź piersanalnuju staronku paeta-hieroja prajektu na Facebook. Adrasy ŭsich staronak. Poŭny raskład lekcyj budzie apublikavany pry kancy žniŭnia.
Jašče možna spryčynicca da realizacyi prajektu «(Nie) rasstralanaja paezija». Kraŭdfandynhavaja kampanija skančajecca 31 lipienia.
Siabry litaraturnaha abjadnańnia «Maładniak», Miensk, 1925 hod. Siadziać źleva naprava: Jazep Padabied, Aleś Jakimovič, Michaś Čarot, Aleś Dudar, Jazep Pušča, stajać źleva naprava: Adam Babareka, Ničypar Čarnuševič, Paŭluk Trus, Anatol Volny, Andrej Aleksandrovič, Kuźma Čorny. U 1930-ch z 11 čałaviek sa zdymku dzieviać buduć represavanyja, piaciora paśla represij nie vyžyvuć
