Biełaruskija pamiežniki nie prapuścili delehata Źjezdu biełarusaŭ śvietu z Ukrainy
14 lipienia na ŭjeździe ŭ Biełaruś u pamiežnym punkcie propusku «Novaja Huta» (Homielskaja vobłaść) byŭ zatrymany siabra Vialikaj Rady Zhurtavańnia biełarusaŭ śvietu «Baćkaŭščyna» archijepiskap Śviatasłaŭ Łohin (BAPC), jaki jechaŭ na VII Źjezd biełarusaŭ śvietu.
Pry sprobie pierasiekčy miažu kala 18:00 jamu było zajaŭlena pra zabaronu ŭjezdu ŭ Respubliku Biełaruś i pastaŭleny adpaviedny štamp u pašpart. Śviatasłaŭ Łohin byŭ vymušany viarnucca va Ukrainu ŭ pamiežny punkt «Novyja Jaryłavičy».
Pa słovach Łohina, biełaruskija pamiežniki pavodzilisia karektna, ale pryčyny zabarony ŭjezdu ŭ Biełaruś biełaruskamu śviataru, jak i terminu zabarony, nazvać nie zmahli.
Padobny vypadak adbyŭsia z arch. Śviatasłavam i ŭ 2015 hodzie, ale ŭ adkaz na adpaviedny zvarot MUS RB admoviłasia nazvać pryčynu i termin zabarony jamu ŭjezdu ŭ Biełaruś. Archijepiskap ličyć, što zabarona na ŭjezd moža być źviazana z rašeńniami rasijskaha boku, u pryvatnaści FSB RF, bo 3 sakavika 2015 hoda Biełaruś padpisała pahadnieńnie z RF ab uzajemnym pryznańni admovy va ŭjeździe na terytoryju dziaržaŭ.
