Pasła Ukrainy vyklikali ŭ MZS Biełarusi z-za «tendencyjnych vykazvańniaŭ u ŚMI»
Fota Vadzima Zamiroŭskaha
Pasła Ukrainy Ihara Kizima vyklikali ŭ MZS Biełarusi ŭ suviazi z «tendencyjnymi vykazvańniami ŭ ŚMI ŭ dačynieńni da vučeńniaŭ «Słavianskaje braterstva - 2017». Pra heta paviedamlaje pres-słužba biełaruskaha MZS.
Pasłu Ukrainy było ŭkazana na toje, što zroblenyja im zajavy nie adpaviadajuć vysokamu ŭzroŭniu družalubnych adnosin pamiž Respublikaj Biełaruś i Ukrainaj, źjaŭlajucca niekarektnymi i ŭtrymlivajuć nieabhruntavanyja abvinavačvańni Respubliki Biełaruś u nievykanańni mier davieru i biaśpieki ŭ rehijonie ABSIE.
Uvaha Pasła była źviernuta na toje, što vučeńnie «Słavianskaje braterstva - 2017» było praviedziena ŭ poŭnaj adpaviednaści z normami mižnarodnaha prava i abaviazacielstvami Biełarusi ŭ ramkach ABSIE. Pry hetym zaprašeńnie vajennych ataše, tym liku Ukrainy, na dadzienaje vučeńnie źjaŭlałasia vyklučna žestam dobraj voli ź biełaruskaha boku, što śviedčyła ab vysokaj transparentnaści mierapryjemstva.
Havorka idzie pra vykazvańnie dypłamata na kanfierencyi Ostrogorsky Forum 19 červienia, dzie Kizima rezka prakamientavaŭ niadaŭnija vučeńni Biełarusi, Rasii i Sierbii:
— Moj vajenny ataše pajechaŭ tudy, dla ich zładzili pakazalny fars. Im pakazali teatralizavanaje pradstaŭleńnie pa zachopie terarystyčnaj hrupy na dambie. Vielmi kłasna zroblena. A sami vučeńni prajšli ŭ inšym miescy, kudy nie zaprasili nivodnaha naziralnika, vajennaha ataše. Treba demanstravać bolšuju adkrytaść.
