«Łbastaja, saboju tanklavaja» — jak apisvali biełarusak 350 hadoŭ tamu
Ścisłyja źviestki pra vyhlad biełarusak XVII stahodździa možna znajści ŭ knizie «Akty, otnosiaŝijesia do juridičieskoho byta drievniej Rośsii», vydadzienaj archieahrafičnaj kamisijaj u 1857 hodzie.
Adzin z dakumientaŭ — śpis pałanianak, jakich paddany maskoŭskaha cara Alaksieja Michajłaviča Hryhoryj Ivanaŭ syn Pustoškin «pryvioŭ da zapisu» 29 maja 1666 hoda.
Ci sam toj Hryhoryj Pustoškin byŭ udzielnikam «nieviadomaj vajny» 1654—1667 hadoŭ i pustošyŭ Vialikaje Kniastva Litoŭskaje ŭ składzie maskoŭskaha vojska dy pryvioŭ na viaroŭcy pałon u svaju votčynu, ci pałanianki dastalisia jamu niejkim inšym sposabam — nieviadoma.
U knizie cytujecca tolki zapis pra ich, tak by mović, rehistracyju na novym miescy.
Imiony ŭsich čatyroch padajucca sa źmianšalnymi sufiksami, što padkreślivaje ich zaležny stan.
Adna ź ich — z Bresta, druhaja — z Hrodna, dźvie apošnija taksama, možna mierkavać, adtul:
«Dzieŭka Chviadorka Ivanava dačka, horada Breścia, z tvaru smuhłaja, nos prost, vočy ciomna-šeryja, rostu nievialikaha, hadoŭ siamnaccać;
Horada Hrodna dzieŭka Marynka Vasilova dačka, vołasam rusaja, vočy šeryja, z tvaru hładkaja, maleńkija vośpiny, nos prosty, rostam siaredniaja, hadoŭ siamnaccać;
Žonka Chviadośjica Chviedarava dačka, vołasam rusaja, łbastaja, vočy ciomnyja, rostam siaredniaja, hadoŭ za dvaccać, saboju tanklavaja;
Žonka Aŭdoćjica Amiallanava dačka, sutułavataja, vočy šeryja, na tvary vośpiny, nos šyrakavaty, pryhubastaja, rostam siaredniaja, płaskavataja, hadoŭ dvaccać piać («połtrieťjatcať»)».
Zapis zrabiŭ dziačok Mikolskaj carkvy Vołaka Dzierškava. Pahost z takoj nazvaj možna znajści ŭ pieralikach nasielenych punktaŭ Naŭharodskaj ziamli.
Nieviadoma, jak skłaŭsia dalej los Tadory, Maryny, Tadosi i Jeŭdakii — ci vyžyli jany na poŭnačy Maskovii, ci zdoleli viarnucca dadomu, ci žyvuć ciapier ich naščadki. Pierad nami adkryŭsia tolki adzin z małych epizodaŭ vialikaj biełaruskaj trahiedyi XVII stahodździa.
Čytajcie taksama:
