Kolkaść achviar pažaru ŭ łondanskim hmachu vyrasła da 12 čałaviek
Palicyja paćvierdziła hibiel 12 čałaviek u vyniku pažaru ŭ šmatpaviarchovym žyłym domie na zachadzie Łondana. Pry hetym u palicyi papiaredžvajuć, što kolkaść achviar moža ŭzraści, piša VVS.
Getty
Pažar u Hrenfieł-taŭer u Paŭnočnym Kiensinhtanie ŭspychnuŭ nočču ŭ sieradu. Pavodle danych miascovych uładaŭ, u momant uźniknieńnia ahniu ŭ 24-paviarchovym budynku mahli znachodzicca da 600 čałaviek. 68 paciarpiełych byli dastaŭlenyja ŭ balnicy, pry hetym 18 — u krytyčnym stanie.
Niekatoryja žychary doma ličacca źnikłymi bieź viestak. Ułady nie ŭdakładniajuć ich kolkaść.
Da ciapierašniaha momantu pažarnyja ahledzieli praktyčna ŭvieś budynak. «Na žal, ja nie dumaju, što my jašče znojdziem tych, chto vyžyŭ», — zajaviŭ šef łondanskaj palicyi Ściuart Kandzi.
Ahoń achapiŭ amal uvieś budynak, na niekatorych pavierchach jon da hetaha času nie patušany. Pryčyna ŭźniknieńnia pažaru jašče nie vyśvietlenaja.
Da baraćby z ahniom byli pryciahnutyja 40 pažarnych raźlikaŭ i bolš za 200 pažarnych. Pieršyja bryhady prybyli da Hrenfieł-taŭer na praciahu šaści chvilin paśla pastupleńnia pieršaha zvanka ab pažary.
Mer Łondana Sadzik Chan zajaviŭ, što hety pažar kłasifikujecca jak «nadzvyčajnaje zdareńnie». Kiraŭnik Łondanskaj pažarnaj słužby Deni Kotan nazvała maštab pažaru biesprecedentnym.
Žyłaja vieža Hrenfieł-taŭer była pabudavanaja ŭ 1974 hodzie. Pavodle paviedamleńniaŭ miascovych žycharoŭ, u budynku niadaŭna zaviaršyŭsia bujny ramont.
Z-za trahiedyi brytanskija kansiervatary i Demakratyčnaja junijanisckaja partyja, jakija pravodziać pieramovy ab supracoŭnictvie, vyrašyli adkłaści abjavu ab vynikach dyjałohu.
Pavodle danych krynic, tory i DIUP abvieściać detali pahadnieńnia ŭ kancy tydnia, a značyć pačatak pieramovaŭ ab vychadzie Brytanii ź ES, zapłanavany na 19 červienia, taksama, chutčej za ŭsio, budzie pieraniesieny na bolš poźni termin.
