U Łondanie achopleny ahniom 27-paviarchovy žyły dom
Na zachadzie Łondana haryć šmatkvaterny žyły dom. Ahniom achopleny amal uvieś budynak.
Da budynka Grenfell Tower u łondanskim rajonie Paŭnočny Kiensinhtan byli adpraŭlenyja kala 40 pažarnych mašyn i 200 pažarnych, jakim pakul nie ŭdajecca spravicca z ahniom.
Pavodle infarmacyi łondanskaj pažarnaj achovy, harać z druhoha pa 27-y pavierchi budynka.
Paviedamlajecca ab paciarpiełych ad dymu, im akazvajuć dapamohu miedyki, adnak dakładnaja kolkaść pakul nie pryvodzicca.
Jość ryzyka, što budynak abryniecca. Palicyja ŭstanaviła kardony i sprabuje adciaśnić natoŭp hledačoŭ z-za pahrozy razbureńnia budynka. Praciahvajecca praces evakuacyi ludziej.
Dahetul nieviadoma, kolki mienavita ludziej znachodziłasia ŭ budynku i kolkich ź ich udałosia vyratavać. Niama taksama nijakaj infarmacyi pra toje, što mahło stać pryčynaj pažaru i jak ahoń zmoh raspaŭsiudzicca na takoj vialikaj płoščy.
U budynku kala 200 kvater.
Viadučy prahramy Amazing Space Džordž Kłark raspavioŭ u efiry Radio 5 Live, što bačyŭ, jak na vierchnich pavierchach chtości machaŭ lichtarom. Pavodle jaho słoŭ, vidavočna, što nie ŭsie ludzi zmahli vybracca z budynka.
Kłark rastłumačyŭ, što sam staić za 100 mietraŭ ad budynka i jaho ŭsiaho zasypała popiełam.
