Były načalnik źbiehłaha ŭ Šviecyju majora KDB: Moŭčan — łajdak i chłus
Deputat Pałaty pradstaŭnikoŭ i pałkoŭnik KDB Piatro Atroščanka ŭ razmovie z karespandentam «Našaj Nivy» prakamientavaŭ historyju byłoha supracoŭnika biełaruskaha KDB Andreja Moŭčana.
Čytajcie taksama: «Chaču addać unukaŭ u biełaruskamoŭnuju škołu»: deputat z KDB skłaŭ top-6 pahroz nacyjanalnaj biaśpiecy
Piatro Atroščanka Fota: pravo.by
Moŭčan uciok u Šviecyju, a ciapier śćviardžaje, što maje dakumienty, jakija śviedčać pra kantrabandu naftapraduktaŭ ź Biełarusi.
Čytajcie taksama: Były supracoŭnik KDB uciok u Šviecyju i śćviardžaje, što maje dakumienty pra kantrabandu naftapraduktaŭ praź Biełaruś
Jak vyjaviłasia, Moŭčan byŭ padnačalenym Atroščanki ŭ 2008 hodzie.
«Čym byŭ admietny 2008 hod? U Viciebsku zdaryłasia «Steła» — vybuch. I ja ŭžo a čaćviortaj ranicy byŭ tam, bo praź niekalki dzion mieŭsia pačacca «Słavianski bazar», — uzhadvaje Atroščanka. —
Razam z hetym my atrymali vielmi surjoznuju infarmacyju — nie datyčna temy «rastvaralnikaŭ», pra jakija kaža Moŭčan. Ranicaj i ŭviečary ŭ mianie pravodzilisia narady, pracavali pa 24 hadziny. Užo tady byli padazreńni, što budučyja terarysty — Kanavałaŭ i Kavaloŭ — akažucca ź viciebskimi karaniami. Tamu da viciebskaha rehijona było asablivaje staŭleńnie.
Paralelna z hetym my atrymali infarmacyju, pra jakuju ŭ ŚMI raskazvaje Moŭčan. Ja byŭ namieśnikam načalnika ŭpraŭleńnia, kuryravaŭ pytańni ekanamičnaj biaśpieki i karupcyi. Moŭčan słužyŭ u adździele ekanamičnaj biaśpieki — heta nie kontraźviedka, darujcie, heta ekanomika. Pra jakuju admovu ad udzieła ŭ palityčnych represijach jon kaža? Dyk voś, ja jaho tak mahu apisać — łajdak ź vialikaj litary. Ja heta padkreślivaŭ užo tady, vidać, tym samym jamu i zapomniŭsia. Tamu što treba było pracavać, a nie łyndy bić — jahonuju rabotu davodziłasia inšym supracoŭnikam rabić. A što da kankretnaj situacyi, pra jakuju jon kaža — dyk nie było ničoha padobnaha, heta chłuśnia, nijakaj kantrabandy nie było. Čamu jon pra heta tolki ciapier pačaŭ kazać, chacia ažno ŭ 2010 hodzie jaho zvolnili, a ŭ Šviecyju padaŭsia ŭ 2012 hodzie? Vidać, sprabuje začapicca tam ciapier, bo ŭ prytułku admovili.
Što jon tam rasśledavaŭ? Jon nie śledčy, kab rasśledavać, heta raz. Jon atrymlivaŭ infarmacyju pra fakty karupcyi, pra fakty, jakija pahražajuć ekanamičnaj biaśpiecy. I jamu pracavać nie davali? Heta nazyvajecca «realizacyja infarmacyi». Darujcie, u mianie byli ludzi, jakija za «realizacyju» ŭznaharody ad prezidenta atrymlivali. Pryzvyčyŭsia ničoha nie rabić, a ciapier raskazvaje».
Andrej Moŭčan, fota Biełsat
Jak vynikaje z vajskovaha bileta Moŭčana, jon pracavaŭ u KDB ad 2000 da 2010 hoda i dasłužyŭsia da zvańnia majora. U 2012 jon paprasiŭ palityčny prytułak u Šviecyi, ale jamu admovili, bo nie pabačyli dokazaŭ palityčnaha pieraśledu. Moŭčan śćviardžaŭ, što zvolniŭsia, bo nie chacieŭ udzielničać u palityčnych represijach. Jaho nibyta pieraśledavali i źbivali paśla zvalnieńnia z KDB.
Z dakumientaŭ Moŭčana vynikaje, što biełaruskija kampanii ekspartavali naftapradukty pad vyhladam raspuščalnikaŭ, kab nie pieraličvać myty Rasii. Publikacyi pra isnavańnie takich schiem źjaŭlalisia ŭ rasijskich i biełaruskich ŚMI ŭ 2010—2012 hadach. Rasśledavańnie hetaha pytańnia pryviało da naftavaha kanfliktu Maskvy i Minska ŭ 2012-m.
Moŭčan śćviardžaje, što nie apublikavaŭ dakumientaŭ raniej, bo bajaŭsia.
