Homielskaja babula-hitarystka, jakuju pakaža MTV: «Kryŭdna, što mianie chutka nie stanie, a majoj mietodykaj tak nichto i nie avałodaje»
Lidzija Drabyšeŭskaja ŭzarvała internet jašče ŭ 2009 hodzie. Z taho času videarolik, dzie jana vykonvaje bluz na hitary z dapamohaj lampački, pahladzieli bolš za 6 miljonaŭ čałaviek z usiaho śvietu. My patelefanavali žančynie, kab daviedacca, što źmianiłasia ŭ jaje žyćci z taho času.
Lidzija naradziłasia na Homielščynie, jaje maci pachodziła z zamožnaha rodu Halickich, šmat kaho z svajakoŭ pa hetaj linii rasstralali kamunisty. Baćka byŭ zvyčajnym viaskovym nastaŭnikam, jaki adnojčy svaimi rukami stvaryŭ skrypku — z taho i pačałosia muzyčnaje zachapleńnie Lidy. Jaje nichto nie vučyŭ notam. Dziaŭčynka samastojna avałodała spačatku skrypkaj, potym akardeonam i hitaraj. Lampačka ŭ jaje ruki trapiła ŭ stałym ŭzroście, kali ściskać struny palcami ŭžo było ciažka.
Pra niezvyčajnuju hitarystku-samavučku napisali šmat vydańniaŭ, jana vystupała na rasijskaj «Chvilinie słavy»…
Nie paśpieła Lidzija Kanstancinaŭna adpačyć ad praźmiernaj uvahi, jak u 2017 hodzie na jaje hałavu «zvaliłasia» novaja chvala cikaŭnaści: viadoma, što videa z babulaj zachacieli vykarystać u šou Clickbait na MTV International. Hučyć kruta, ale da hetaha času, akramia kłopataŭ, joj heta bolš ničoha nie pryniesła.
Jak i raniej, babula siadzić kala maleńkaha homielskaha rynku pad aptekaj, što nasuprać vakzała, i hraje to narodnyja miełodyi, to bluz. Navat kali tut śpioka, nie pierasiadzie ŭ cień, bo na inšym miescy i hitara budzie hučać pa-inšamu, pryjdziecca jaje pieraładžvać. Televizar złamaŭsia, rajonnaje radyjo adklučyli, tak što novyja pieśni ŭ jaje repiertuary źjaŭlajucca naŭprost kali jana pačuje niedzie miełodyju na słych. Babula vielmi lubić frantavyja pieśni, ukrainskija i, jak ni dziŭna, rańniaha Vitasa. Pra ajčynnych estradnych ža kaža, što «ŭ bolšaści ź ich ŭsio, byccam, nie z taho miesca raście».
«Voś siońnia atrymałasia zarabić usiaho 1 rubiel, a vy kažacie — słava. Navat na leki nie chapiła. Ale ja ničoha nie patrabuju i nie asudžaju ludziej, ja ž nie dla hrošaŭ hraju, a dla siabie ŭ pieršuju čarhu. Dzietkam vielmi padabajecca i maładym ludziam».
Babula i radujecca, što jaje pakažuć na MTV, i nie, bo ŭvaha ŚMI paradžaje plotki susiedziaŭ: «Žurnalisty zarablajuć na mnie hrošy, a ludzi z Homiela dumajuć, što i mnie z hetaha pierapadaje. Plujuć u moj bok sa słovami «kali tabie ŭžo hrošaŭ chopić?». Brydka heta, ale chaj brešuć: sabaka breša — karavan idzie». Žančyna kaža, što sustrakajucca navat nienarmalnyja, jakija sprabujuć hitaru adabrać. Jana i ŭ milicyju źviartałasia, ale biezvynikova: «Jakaja milicyja? Kamu prostyja ludzi treba? Niama dziaržavy. Adny bandyty syšli — inšyja pryjšli».
Bolš za ŭsio na śviecie Lidzija maryć pra toje, kab znajšoŭsia muzyka, jakomu jana pieradaść svaje viedy. Z synam i ŭnukami nie atrymałasia — nie dadziena. Pryjazdžali i staličnyja virtuozy, ale pakul nichto nie zmoh paŭtaryć jaje majsterstva.
«Ja z 1932 hoda, uzrost biare svajo, mnie ŭsio ciažej chadzić i hrać. Budzie vielmi kryŭdna, kali pierajemnik nie znojdziecca…», — uzdychaje Lidzija Kanstancinaŭna.
Spadarstva, kali vy viedajecie kahości, chto chacieŭ by i moh pieraniać majsterstva spadaryni Lidzii, pišycie nam! Dapamožam źviazacca z homielskaj zorkaj.
«Naša Niva» — bastyjon biełaruščyny
PADTRYMAĆ
